कक्हरम्बड् मियड् जिउ तनि: । जिउ मेन्कन जिबोनननि: तनाए्। एन्का दो निइ दोन्डा नो: लेकाए् नेलो: अ: । सेने चि: चलेन रे जाङ – जाङ तने: रिकाना, एना मेन्ते ओकोय – ओकोय दो जाङ – जाङ दोन्डा हों को मेतइया। मेड् तय दो षिषिर जुरुल गेंगेर गे: नेलो: अ:। मेडे रेदोए् बोरो गमं गे चिर्गलो: अ: । कक्हरम्बड्: उपुनिया कटा, बरिया मेड्, बरिया लुतुर, आ अर चड्लोम मेन: । होमोह तय दो दोन्डा गे मेनेम। षुमं निमिनं बेन्गा चि दोन्डा दोए् रगम चि रेपेहकड् गेया, निइ दोए् जुउरा। निइ य: अइया रोङ मेन: , ओको दोए् हेंदे, चुइला गे पुंडिना। ओको दोए् पंडु ससं, करे: अर: ना। मिषाए् लिइलो: अदोङ मिषाए् गदेड् जो’ङेना। एन्लेकाते मिषा दोए् गिइडेना ओन्डो: बन्रे माए् पलपोयोङेना। रोङ तय बराबरि मियड् चि मिड्गे काह तइना। एना मेन्ते गेदा सोदोरि लेका ते बहुरुपी यो को मेतइया। सदय दो निइ पलपोयोङ गे: तइना। गिइड् यन रे हेंदे कड़ेयाना। एन्का गे पुर: उतर यन रे दोए् नोग: नुउम-नुउम उतरो: अ: । पुंडि हों गे पोयोह ओन्डो: पुन्डि ओकोबेना। पुंडिइ ते ससं अदो जुङगुड् अर: मते सलु ओन्डो: जेङगा। लिइल इबिल यन रेदो गेरेङ ओन्डो: गुरुञ् रेनाह ना। गदेड् मते गुल गुल तयोम गदेल्ल् उत्रं जकेना। नेका ते इमिन रोकोम रोङे: बोदोल बियुरेया। मेन्कन इमितं गे निइ कुरकुरेन तना मेन्ते अदय मे।
ओतोल्ल :- लको बोदरा
