जुम्बुई गुंडी लःई रे सेंगेल चियं जुलोःअ,
जा चिमिनेः जोमे रेयो एना मेन्ते काए बियोःअ।
बुगिनःए नेल नम रे एसु जति गेः हायाओःअ,
जा चिलिका तेरेयो एना दो बडगे जोमे सुकुउअ।।
जुम्बुई गुंडी दो एसु गेः इलब जलबा,
अतिङ तन रेयो सामा निरा निराए जोेजोमा।
संगि तला कोयतेयो निर ओल्ल तेयः अए बुदिइया,
इंञ गे जोम अयरे चा मेना गे मोनरेः उड़ुइया।।
जोमः तःअरे जुम्बुई गुंडी एसुई लमर लुमुरा,
चिरका चकब तन नई गोटा मुलिः निर बियुरा।
अतिङ रेयो सामा नेपा एनपाए ओमसोङया,
बुगिन लोदोब किरषि कोगे नई नेल चिरगलेया।।
गोट रेयो जूम्बुई गुंडी काए हापा जतिना,
सबेन को जिराव कनरे हापातेः अतोमेना।
जाईयःअ बकई कोरे गेः नई दोए निर बोलोना,
अएः लगिडते गुसिया कोरे गोपोंदे होबाना।।
गुपि तन गउ दो एसु जति गेः कुरकुराइया,
जुम्बुई गुंडी मेन्ते एसुई रू तम लगाइया।
जा चिमिन रू तमिई रेयो नि चि सुदारेना,
जोनोम रे अगुवन जुम्बुई चि नि बागेया ?
जुम्बुई गुंडी कोदो होड़ कको सुकुउअ,
अकारिङ को तन रेयो नेको सङगेको उरूमोःअ।
एङगः गुन दो होन रेयो जन इदिना,
अए लेकागे होनकोओ जुम्बुई बुदी को सबेया।।
एरं गोंदे रू तम तेः बुनडुर चबा कनोःअ,
रूई रेयो निदो जिपिड ते जोमः तःए सेनोःअ।
जुम्बुई सुमं दो बनो गे लांडियाव तय ललिया,
पईटि नं जोवहा लिइ रे गितिः तेयः अए बुदिइया।।
जुम्बुई गुंडी जुम्बुई रेयो को असुलिइया,
गोवां रे जोगव किइ ते नि सेबा षडड़ाइया।
उकु दनं केन्ते जा गेः जोम हुन्डी अगुइया,
अएःई केहते गुरिः लेका ते गुसियाए देंगइया।।
दुड़ु- हिर्ला बुधन सिंह हेस्सा
