ततञ लोओः ऐसु पुरःअ कजि लिङ ओपोरोःअ,
अको सोमोयःअ कजि जगरते तेगे अःए दइयोःअ।
अःए मेनेया अले सोमोय गे बुगि तइकेना,
नुइलाः सोमोय रे जिबोन होलोकोचो तना।।
अंञ मेतइया अपे इमतं नेया एनाको तइकेना,
अःए मेनेया कह तइकेन रेयो सुकुले तइकेना।
ततञ मेनेया मिड टका रेयः एसु गोनोङ तइकेना,
अपे सोमोय एना दो मिड सोह टका बराबरि यना।।
अंञ मेतइया नाः दो ओत मियड ओड़ाःअ गे बइयना,
ओड़ाःअ रे दुबा कनते गोटा दिशुम नेलोः तना।
आए मेनेया एना तेगे चापे रोगा पोचाओः तना,
लंडिया गोदा जिबोन ते एसुपे अंडियाव तना।।
नमा जुग मेनतेपे ममरं तनाए मेनेया,
अले लेका जिलिङ कापे बालातिङ तनाए मेनेया।
षुनुम मसला अपे दो पोदोगा चबा केड पेया,
लेः हाया रेगे सबेन पे मला मेड चबा कना।।
तिकि चोड़ा जोम केन को अले नेल लेका ले पे,
मिड सोह सिरमा अइष दो अले पुरा अगुइ तनगे।
अंञ मेतइया अपे सोमोय मुरूकु को ललि तइकेना,
नेया कजि अयुम तोरसा ततञ दोए डिडिउटा तबेना।।
ततञ मेनेया अले इमतं मोन्डो का तइकेना,
5 बारा पड़ाव रेयाःव एसु कजि गोनोङ केना।
नोकोरी लगिड ओड़ाःए तेको आओर जोबोर ले तइकेना,
नाः अपे डिगरि तड रेयो ओकोयो कको कुलिपे तना।।
अंञ मेतइया अपे सोमोय दो होड़को कोहम तइकेना,
एना मेनते गेचा अपे दो सुकु सुमुकिपे तइकेना।
ततञ मेनेया सेंया रेयोपे होन पे संगिको तना,
अपेयःअ दुकु दो अपे तेगे पे लनःअ इदिइ तना।।
ततञ मेनेया ओल पड़ाव ते अपे मुरूकु ओन्डो यना,
अपनः सुकु सुबिदा लगिडते दिशुमपे उजड़ाए तना।
अंञ मेनेया ततञ हड़म लोओः कजि हपाराव मुसकिल तना,
नेल किइ रेगे नाः बरसिङ एटाः होराञ सेनोः तना।।
दूड़ु-हिर्ला बुधन सिंह हेस्सा
