देषाउलि मह बुरु गोवारि
𑣿 𑢮…𑢼…𑢶… 𑢵𑣂𑣊 𑣔𑣉𑣙𑣖!
𑢹𑣂𑣜𑣚𑣁 𑣋𑣈 𑣋𑣜𑣁𑣖 𑣋𑣁𑣀𑣆𑣞𑣜𑣂 𑣔𑣈𑣝𑣁𑣇𑣚𑣂 𑣖𑣙 𑣗𑣃𑣜𑣃
𑣙𑣂𑣜𑣚𑣁 𑣋𑣈 𑣘𑣁𑣀𑣇𑣆, 𑣎𑣅𑣜𑣁, 𑣋𑣉𑣿 𑣙𑣗𑣊𑣋𑣁.
𑢳𑣋𑣈 𑣈𑣜𑣁 𑣗𑣂𑣀𑣔𑣂 𑣈𑣜𑣁 𑣌𑣉 𑣞𑣜𑣂 𑣔𑣛𑣈 𑣘𑣈𑣛𑣈𑣄,
𑣙𑣉𑣅𑣉, 𑣔𑣄, 𑣞𑣈𑣊𑣋𑣈𑣚, 𑣙𑣂𑣓𑣑𑣃𑣊 𑣁𑣜 𑣌𑣉𑣓𑣉𑣅𑣊.
𑣿 𑣙𑣗𑣁𑣜𑣊 𑣔𑣛𑣈 𑣜𑣃𑣃𑣘 𑢶, 𑣁𑣆𑣔𑣁 𑣙𑣉𑣛𑣉 𑣙𑣉𑣉 𑣞𑣉𑣌𑣁,
𑣙𑣂𑣜𑣚𑣁 𑣋𑣈 𑣖𑣁𑣊 𑣗𑣃𑣜𑣃 𑣙𑣗𑣊𑣋𑣁 𑣗𑣃𑣜𑣃 𑣌𑣉 𑣙𑣂𑣜𑣚𑣁
𑣙𑣂𑣜𑣚𑣁 𑣋𑣈 𑣙𑣗𑣁𑣜𑣊 𑣔𑣛𑣈 𑣝𑣂𑣜𑣖𑣁 𑣞𑣜𑣂 𑣞𑣂𑣍𑣙𑣗𑣊𑣋𑣁.
𑣿 𑣙𑣗𑣁𑣜𑣊 𑣔𑣛𑣈 𑣜𑣃𑣃𑣘 𑢺𑣂𑣒𑣁 𑣋𑣉𑣞𑣍, 𑢹𑣗𑣊𑣋𑣁 𑢾𑣂𑣊𑣋𑣜𑣁𑣅
𑣙𑣂𑣜𑣚𑣁 𑣋𑣈 𑣔𑣃𑣘𑣙𑣃𑣗 𑣔𑣂𑣝𑣃𑣖 𑣖𑣁𑣊 𑣙𑣗𑣊𑣋𑣁
𑣙𑣂𑣜𑣚𑣁 𑣋𑣈 𑣏𑣓𑣁𑣚𑣄 𑣔𑣂𑣝𑣃𑣖 𑣖𑣁𑣊 𑣙𑣗𑣊𑣋𑣁.
𑢵𑣂𑣞𑣂𑣊 𑣁𑣚𑣈 𑣏𑣂𑣜𑣃 𑣏𑣜𑣂𑣄 𑣝𑣂𑣜𑣃𑣊 𑣎𑣀 𑣖𑣓𑣖𑣂 𑣙𑣉𑣓𑣌𑣉 𑣘𑣁𑣅𑣕𑣈
𑣞𑣃𑣌𑣃 𑣞𑣃𑣖𑣃𑣌𑣂 𑣔𑣂𑣝𑣃𑣖 𑣗𑣓𑣆 𑣓𑣀 𑣁𑣚𑣈 𑣎𑣉𑣁𑣙𑣜 𑣖𑣈
𑣜𑣂𑣊𑣋𑣈 – 𑣗𑣂𑣜𑣍𑣎𑣂, 𑣓𑣃𑣗𑣄 𑣌𑣉𑣔𑣉 𑣓𑣃𑣔𑣃𑣜 𑣁𑣕𑣉𑣖𑣈𑣖𑣈.
𑢺𑣃𑣌𑣃 – 𑢺𑣃𑣌𑣃𑣖𑣂 𑣌𑣃𑣚𑣋𑣂𑣅𑣁 𑣞𑣜𑣂 , 𑣝𑣂𑣜𑣃𑣊 𑣘𑣃𑣍𑣎𑣂 𑣙𑣉𑣓𑣌𑣉 𑣕𑣂𑣞𑣂𑣊
𑣁𑣑𑣉𑣄 𑣕𑣓 𑣙𑣈𑣀𑣔𑣈 𑣓𑣃𑣇𑣖 𑣓𑣃𑣗𑣄 𑣕𑣚𑣁 𑣌𑣉𑣅𑣕𑣈
𑣁𑣁𑣔𑣂 𑣔𑣉𑣜𑣉𑣖 – 𑣔𑣉𑣝𑣕𑣃𑣜 𑣌𑣉𑣜𑣈 𑣞𑣈𑣌𑣉𑣜 𑣜𑣃𑣁𑣙𑣚𑣈𑣖.
𑢵 𑣁𑣓𑣕𑣁𑣚 , 𑢵 𑣋𑣃𑣖𑣂,𑢵 𑣖𑣃𑣚𑣃𑣌𑣃 𑣔𑣂𑣝𑣃𑣖 𑣙𑣕𑣃 𑣑𑣂𑣙 𑣕𑣚𑣁,
𑣜𑣉𑣋𑣉 𑣎𑣃𑣋𑣂𑣅𑣁 ,𑣙𑣞𑣃-𑣔𑣃𑣌𑣃, 𑣙𑣂𑣞𑣁 – 𑣏𑣈𑣓𑣒𑣁 𑣌𑣉𑣜𑣈
𑣕𑣈𑣊𑣈𑣓 – 𑣗𑣓𑣆, 𑣘𑣀𑣑𑣁 – 𑣘𑣂𑣛𑣁 𑣌𑣉𑣅𑣕𑣈 𑣔𑣃𑣄 𑣜𑣃𑣁𑣙 𑣚𑣈𑣖.
𑣿 𑣙𑣗𑣁𑣜𑣊 𑣎𑣉𑣁𑣙𑣜𑣖 𑣕𑣂𑣊 𑣔𑣉𑣙𑣖!
ओ’ङ ज… र… म तिङ दोह्म!
हिर्ला गे ग्राम गांइसिरि, देषाउलि मह बुरु
हिर्ला गे पांउइ, जयरा, गोवांह्बोङ्गा।
नगे एरा – बिंदि एरा को सरि दड़े क्ड़े:,
ह्यो, द:, सेङ्गेल, हिन्डुङ अर कोनोयोङ।
ओ’ङ वारङ दड़े रुउप अम्, अइदा होड़ो हो’ सोका
हिर्ला गे माङ बुरु ह्बोङ्गा बुरु को हिर्ला,
हिर्ला गे वारङ दड़े षिर्मा सरि सिञ्ह्बोङ्गा।
ओ’ङ वारङ दड़े रुउप लिटा गोसञ् ह्बोङ्गा सिङ्गराय
हिर्ला गे दुप्हुब् दिषुम माङ ह्बोङ्गा
हिर्ला गे चनाल: दिषुम माङ ह्बोङ्गा।
तिसिङ अले चिरु चरि: षिरुङ जं मन्मि होन्को पायते
सुकु सुमुकि दिषुम बनइ नं अले जोवर मे
रिङ्गे बिरञ्जि नुब: कोदो नुदुर नतोमेमे।
लुकु – लुकुमि कुलगिया सरि, षिरुङ पुञ्जि होन्को तिसिङ
अडो: तन हेंदे नुउम-नुब: तला कोयते
आदि दोरोम दोष्तुर कोरे सेकोर रुवा लेम।
ओत् अन्ताल, ओत् गुमि, ओत् मुलुकु, दिषुम हतु डिह तला,
रोगो- जुगिया, हसु दुकु, हिसा – चेन्टा कोरे,
तेङेन – बनइ, पंडा – पिड़ा कोयते दु: रुवा लेम।
ओ’ङ वारङ जोवरम तिङ दोह्म!!! 🙏
दुड़ु:- बोयो बुधराम गागराई ✍️
सगइयन पुति :- उपरुम स्मारिका 2009
