होड़ को काजी जगार रेको आयुमा काना,
सेनो: यान काजी बागे ताम को मेने ताना ।
सेसेन तन काजी गे पुरे: गोनोङओ ताना,
तायोमे यान कोदो पपारी इदियो: ताना ।
दुरं दो तिसिङआ का दुरंओ ताना,
सिदा मुनुआ गे सिबिल आदाव ताना ।
सोंगे दो ओकोयो दुरं काये: बाई ताना,
पपारी दुरं कोये तेगे: येतो इतुन ताना ।
सेसेन तन काजी हो को कको आयुम सनं ताना,
काजी लेरे को मेने नेया नामा का ताना ।
नेन काजी दो आञओ बुगि तेञ येतोआना,
येना चेना: सांगी ताला रेम बुऊ बाये ताना ।
मुनुये: काजी साबेन को ताआ रे बानो: याना,
येतोआन चिमिनं होड़ को ताआ रे ताईया काना ।
येतोआन होड़ चिमितं दनं आतोमो: ताना,
चनाबा होड़ को साबेन आड् माड् चबाओ: ताना ।
येटा: कोआ: पुती कोरे जा नेला काना,
हो कोआ: काजी दो का ओल तोला काना ।
आकोआ: काजी गे ओल पेरे:या काना,
हो होन को येना जोबोर पांजाये ताना ।
काजी तिसिङंआ रे दुरं होलाआ बुगिना,
येनरे येनं जाती आयार सा: उसकुर इदिना ।
चिमिनं हो को काजी को तिनुल बियुरे ताना,
दुरं सा: दो काको मोन उतारे ताना ।
काजी रा: बाजी रे हाटो दोर ताईना,
दुरं रा: कोरं रे सूर नोतोर ताईना ।
काजी अर कामी रे जोदी सोपोरो: सगाई ताईना,
सेरेङ लेकान हुदा तिंगु रकाब दाईना ।
काजी ओर ओपोर रे कामी का होबाना,
होबान तन कामी ओ कागे पुरा दाईना ।
दुरं ते होड़मो रा: लागा ओटं आतोमेना,
ताड़ लोओ पोरताड़ लेरे ओत रूमुलेना ।
दुड़ु-हिर्ला बुदन सिङ हेसा: तिकिं.
