Ho Munda Kavita jibon judi
जिबोन जुड़ी अम जपःअ रेगे अञः तइनमे,
जिबोन सेसेन होरा रे सुतुःउ तञमे।
अम बेगर दो जिबोन रे पेहेः कञ नमे,
काणा कनिः लेका होरा बारा अञ सेने।।
जिबोन जुड़ी अमः लगिड गाड़ाञ परोम केडा,
षिरमा चुटिः बुरूञ अंइल परोम लेडा।
जनुम चोगा होरा रेयो कटा कञ गाव यना,
सेङगेल तलाए तेरेयो अञ पुचुःउ परोम लेना।।
हो दिशुम दमुले तेयःअ पइटि मेनःअ,
अम बेगर एना पुराओ तेयः बनोःअ।
बोइरि कोदो दिमसि रूउप को बोदोले तना,
हो को तला जोबोर को रेबेड बोलोन तना।।
नेयः तेरः कजि जगर ते हो को आडोः तना,
सारी चकड तेयःअ को कको सलाकिचिलि दइ तना।
ओल पड़ाव रेदो हो को एसु को मारू यना,
हो पड़ाव दो बनो एनाको दिकु पड़ाव तना।।
दिकु कोः दो ऊटि उटि को अटकर चिरगल तना,
दिकु बोंगा कोगे ओड़ः रेको सेबा षड़ा तना।
पुरःअ पड़ाव यनते एसुको रांसा रसिका तना,
कको चिरगले तना चिमिन सनिङ रेको आडा कना।।
जिबोन जुड़ी नेकोलं केसेड कोटोङ रूवा कोअ,
जाति बिति सासांकिर आड सोड दोडोः तना।
अपनः जाति अपनः हो गे तेगा उजुड़ाए तना,
दिकु पेंद पोरपोञःओरे सबेन को तोला कना।।
जिबोन जुड़ी एनकन बुडदि कोलं एतो इदिइया,
अपनः हो जेमोन अपनः सः को हुजुःउअ।
अपनः हयम दोरोम दोष्तुर को दुलड़ जोतोनेया,
हिरिः पिरिः या कनःअ जेमोन को हलं गलं रूअया।।
हो मेनते कुड़म तपिं केनतेको कजिइ चा,
एनकन रानु रेएड कोते लङ ओजोः आबको चा।
जिबोन जुड़ी अम बयेड तलं अलोम अतोम बगेयञा,
जिबोन मुचड अञ अम जपःअ जपःअ रेगे मेनःअञा।।
दुड़ु-हिर्ला बुधन सिंह हेस्सा