Ho samaj re esu marang komjori
नेन जोका कोंजा नोःअ रे – हुदा रे नियम दोरोम इटिङ का तइनरे हो को अपन दपइ लेका मान मनातिङ को रिकाया। नेया कोदो होनं हातु मुन्डा, मानकी ,दिउरि कोवः पइटि तना । नेन दिकु ओल पडा़व ते आकोवः मइन मनातिङ का तइन तना ।हातु होको आकोये ते पुराः सेंया को बइन तना । सरकार हो कोवः शासोन बेबस्ता ये उदुर हांदिइ तना । ओकोन समाज रेन होको मिड् हाटो चि चान्डुः रे मिड् तःअ रे जुमुर लेन्ते अयर सः बिर्र होरा को जगर जपगर अर आपायुम तना ऐनको सबेन होरा रेको अयरा कना। हो कोरे येनाको बनोः यना ।सबेन को अपन अपिन चबा यन्ते, हिंसा हिपिसिंगा तेको कोमजोर इदियोः तना । डियङ रासि रेको जोबे यना ।होन कोवको नु सेबे इचिको तन ते ओल पडा़व रेको कोमजोरोः तना । दोन बिति इदि केयते चेतन लतर ,नइकि रेंगेंए रेयाः हिला सला तइयोः तना ।अपनः बराबरि नेल केयतेको गुटि गोओटोन तना । नेया रेयाः लपा दो अतयर को इदि जोङ तना । ऐटाः जाति कोरे आँदीन तनको दान्डे दोन्डो कको नमे तनते बोरसा लालि इदिन तना । बाबा ओड़ः कोरे दिकु आरकि को बोलो यनते लुकुमि माँ ओंवा तना । नियम जिन्डल तेगे कोवा तनिःइ गेलेया लेकाए ऐरान तन रेदो कुई तनिःयो ऐनका गेः पइटिइ तना ।गापाआः लगिड् का उडुः केयते सेसेन तन सोमोय रेगे सबेनः को चाबाए तना ।अरजाव को एतोआन रेदो करचा कको ऐतोआना। ऐंगा आपुगे बुगिन होरा काये सेने रेदो होन गाणा चिका बुगिन होरा को सेसेना । हुदा रेयाः नेलेकन कोमजोरी को नेल केयते एटाः जाति को बोरसा को नमे तना ओन्डोः हो हापानुम को चकड् केय कोयतेको बेपर को तना ।ओला कन कजि ते नेले कन कजि को इंगुलोः तना ।
हिर्ला :- बुधन सिंह हेस्सा