Ho Kaboy Sona Bakara
ततञ हड़म रोवा लेडा सोना बाकरा दरू,
दरू रेको चेरो बेरोन ओय गङगोरसालु।
मताओ रेले जोमे अले दरू रूकु रूकु,
मांदाओ रेयोले जोमे नं एसुले सुकु।।
जोहोः तइकेन बाकरा रूमपा रूमपा,
गोडे तइकेना ले अले कोमपा कोमपा।
रोय तइकेनाले नेया दो हटःअ हटःअ,
लुपुःउ तेले जोमे तइकेन जल चोटःअ।।
राचा रेगे तइकेन तले सोना बाकरा,
जोमे लगिड होड़ कोदो कोयोः बियुरा।
होरा सेनो होड़ को हेता होरा,
सोना बाकरा होड़ मोन गेः ओर बोरा।।
बामेय बोष्टोम को अटकर चिरगल केडा,
अले ओड़ःअ रेको नोजोर बाण एमन केडा।
ततञ हड़म लोः सगइ को तोल पटु केडा,
बिलिकि बिदुवा को चड़ोन अदेर केडा।।
ततञ दो सिदा सिदा हड़मेः तइ केना,
चकड लबः ते अएः काए बिषिः बिटललेना।
पेंद कजि जगर को काए अटकर चिरगल दइयना,
दरू समते रूबे तेयाःअ को नमे यना।।
ततञ हड़म चिमितेङेः बोंगा यना,
दिकु बदुड़ि को निदा अपिर अगु लेना।
जोमे चिमनं इमनं कको जोम केडा,
पुरःअ ते नेको टपा गसर चबा केडा।।
दिकु तिह चिमतं दरू रे जुटिडे यना,
बाकरा जोह सबेन बोदोल रेङाह यना।
सोना बाकरा दो टोसे मोसे चबा यना,
नोगोड तइकेन बाकरा दो मोरोःए यना।।
बुडदि तयोम दोले एतो अगु केडा,
गोटा मुलि नःअ दोले पाचारि केडा।
पाचारि तड रेले चेनःअ ले नम केडा?
मोरोःए तेयःअ गेले तञ एसेरा कडा।।
दुड़ु-हिर्ला बुधन सिहं हेस्सा