Kaboy Idu
इदु चुइला होरा दो बइयोःवा,
येन होरा अंञ निर सेनोःवा ।
इदु चुइला सोड़ोपो बइयोःवा,
गाड़ि मोटोर तेंञ सेनोःवा ।
इदु चिमिन दिन अंञ जिइडेना,
नाःअयते रोगा नमिञ तना ।
येन दिन गेंञ नेल तांगि तना,
सयेडे होरा गेंञ तुन्डु तना ।
इदु अंञाः जाति चेनाः चिकावोःवा,
ओत् रे बन्चावन चि मुचडोःवा ।
ओकोयो उड़ुः जोकाव बनोःवा,
नेया चिकाते जिइड् तइयोःवा ।
इदु दाःआ चि तोरं आतुईया,
जेटे लोलो चि रोंगो चबाया ।
बुरु चि नेया लतोब् तोपाया,
होयो होरलोसि चि ओटंङेया ।
इदु कुला कोचि नेया हाबेया,
बलु कोचि तोरं गोतः पोरंङेया ।
इदु बिञ कोचि नेया सोदाया,
हतिकोचि तेगा रसुम् रोचोडेया ।
इदु रिंगा अकल चि गोजेया,
सेंगेल गामा चि अतरेया ।
इदु कुम्बुह जुम्बुई चि इदिया,
गाड़ा गितिल चि तंञ तोपाया ।
इदु सिंगी तोरङ चि उकुना,
चन्डुः इप्पिल चिको दनंङेना ।
नुबाःरे अंञ चिका बाआना,
जिबोन डोंगा तञ होकाना ।
इदु तोरं सुकु तेचिञ तइना,
येनागे अंञ दोंञ सनं तना ।
येनातेंञ कुरुमुटुन लगन तना,
सिङबोंगा सिंगी निदाञ गोवारि तना ।
* नोट- इदु कजिदो इदु गेबु मेनेया, मेनदो नेयावगे जिबोन चिदु लेका बितर बितर तेः जोम पोदोगा चबाया । येन्दारं रेयाः बोनोदोल को नेल केयते मोन बितररे येसु पुराः कजि को हिन्डुं बियुरेना । होड़को मेनेया- चेनाःव आलोम उऊड़ुःवा, राँसारे तइन मे । चेनाः कजि तन होड़ दो काये उड़ुः तना ? जिबोन मेनाः जोङ उड़ुः दो तइन गेया । येन रेयो बोःये (घटाव) दो बनो, सः (जोड़) रेयाःगे उड़ुः गोरोज तना । ओकोना होबन तेयाः दो होबन, येनादो कागे दरोम दइयोःवा । देरं, तोरं कोरं कजि कोगे सबेन मुलि पोरं तना ।
बितियेम ।
ओल-हिर्ला बुदन सिङ हेसा: तिकिं ।