Ho Kaboy-Esu sangi hol kowa
एसु संगि होड़ कोवः हतङरे नेया बोलोवा कन ,
दिकुको का ओतोङ लेयरे जिबोन उन्नति का होबन |
बिड्दा बुदि ऐतोय काजि दो ऐसु बुगिन काजि तन,
आकोवः चाल चोलोन हर सब दो बुगिन काजि का तन |
ऐसु संगि जुवान कोवः मोनरे उडु,: होबन तन.
दिकु लेकाञ नेलो:रे होनं हो कको उरुमिञ |
ऐसेल लेकन हापानुम होनं अंञ आणान्दिन ,
टाका सोना बिति होनं हनर होञर को ऐमञ |
ऐसु संगि होड़ कोवः बोओ:रे नेया बोलोवा कन.
हो जाति मेन्ते अंञ दो दिकु को हिला तिञ तन |
अपनः लःई गे नेलमे चेना: जातिम उडु: बा तन,
जाति बिति जा यनगे अपनः बयेड् सुमुकि होबन |
ऐसु संगि होड़ कोवः हतङरे नेया हिन्डुङ तन,
हो हयम लिपि ऐतोय रेयो जेतन लपा बनो: यन |
गोये: बुनुम ऐतेदो बुरदुड् काको ओ:ल् तन ,
सामा कोरे नेया लगिड् टाका पोयसाम करचा तन |
ऐसु संगि होड़ को सामा चेतन तेको कजिइ तन,
आबुवः दिशुमरे आबुवः राज गेचा गोरोज तन |
राज गादीरे चिमतं ऐनकोगे दुब् दटोब् तन ,
दिकु कोवः काटा तलका गेको जाल बियुर तन |
ऐसु संगि जुवान कोवः हतङ डोम्बोल् चबा यन,
हो सुसुन दुरं कोदो ऐसु मेयेर को आदाये तन |
सेता: आयुब् दिकु दुरं को बाजा बजणाये तन,
दिकु कोले हर गोसे: केड्को मेन्ते ऐसु को रसिका तन |
ऐसु संगि होड़ कोवः अपनः उनुरुमगे बनो: यन,
हातु दिशुम बागे केयते डोंगोल रेको जान्टा यन |
बर गंडा लेका मेना: कोगे जाति बिति राका तन,
मजोतो काको नामे तन्ते ऐनको उसा उसान तन |
ऐसु संगि हो पंडाति को नेल आगु पंजाआ कन,
हो डियङ दोको बागे तड् दिकु डियङ को नु तन |
अपनः हुदा लगिड् दो अपनः हो गे बइरि बइया कन,
जाति बिति उजुडा तन: मेड् समनं रेबु नेले तन |
दुडु ,.. बुदन सिंह हेस्सा:
