Ho Poem-Prem pase
नाःअ बरसिंङा सेपेड् हापानुम को,
पेरेम पासेरे पुराः पपासे तनाको ।
मोबाइलते येसु सुविदाआ कनाको,
इन्टरनेट कोते जपगर तनाको ।
जपगर अयर दो होबन तन,
नेपेल दाे चनबते होबन तन ।
आपासोरा इमिन अयरेन तन,
बपागे तयोम कको दइ तन ।
पोन् तेको दिपिलि नपम तन,
टिरा पतानि लेकाको बइन तन ।
अयर सः उड़ुः दो बनोः यन,
सेता कोवः लेकान् पेरेम तन ।
सेंया कोवा कुइ सबेन कोगे,
पेरेम तेको बुल् पगला तनगे ।
नमा जुउग नुतुम कजि केयते,
पेरेम रेको पपासे तनगे ।
कोवा कोवः कजि का लेकाना,
कुई को नं नेया कागे बुगिना ।
दिशूम चिमिन अयर इदि तना,
पेरेम इमिन हेलो डोबोलोः तना ।
कुई कोवःगे पुराः दुकु होबाना,
गियुः गमङ रे दगिको होबाना ।
पसाव केयतेको चनलको तना,
बजर कोरेको बेपरको तना ।
ऐटः कोवः नेया रोगा दो तना,
हो कोरे नाःअ दो जनेन तना ।
ऐसु ताःअ रे नेल नामा कना,
हो कुईको पुराःदो पासेवोः तना ।
सबेन जिनिसिगे जाली यना,
पेरेम रेयो नेया सरुबे यना ।
सारि पेरेम दो कोम इदिन तना,
चकड् पेरेम दो जलातिङ तना ।
* नोट-सिदा सादा आदिवासी कोवः कोमजोरी रेयः लपा चिलिकाते आबु पुराःबु नमेया मेन्ते बोइरी को दिमसि को कुमुटि तना । येसु पुराः हापानुम को डोगोल कोरे पइटि नुतुमते चकड् इचिन तना । नेको कजि बुझाव तेयाः पइटि सेंया गुटि कोवः तना । येना उड़ुः केयते नेया कबोय ओले यना ।
बितियेम । दुड़ु-हिर्ला बुदन सिङ हेसा: तिकिं ।
