Kol Lako Bodra ki jeevanee
* जोनोम – गुरू लको बोदरा तिकिंये: जोनोम जाते पासेया हातु, खूँटपानी प्रखण्ड रे दिलं मसमत् 19/9/1919 इंदि अंगाई पोनाई उलं ने हर्ताहसा (ओत दिशुम) तला रे कटा किं मंडा लेडा । येंगा दो हिर्रा जानो कुई बोदरा अर आपु हिर्ला लेबेया बोदरा ।
गुरू तिकिं येंगा गोरोब रे तइकेन सोमय मियेड् रिषि पासेया हातु सेनेयान ते येंगाते तुमान किये: । मेताइये: ची अमा: नेन गोरोब रे येसु मरं ज्ञानी होनेम गो:वा कईये । नेन होना: जोनोम अयार ते मुड़ चिति “ओङ” रेया: षाड़ी आयुमो:वा ।
तला निदा आकिङे जोनोम होबा लेना । इमतं रिषि काजि केड् लेकागे लको बोदरा: तिकिङे जोनोम रआ “ओङ” रेया: षाड़ी आयुमेयाना । होमो रे पोयता हिसिर कन तेकिङ जोनोम लेना को मेनेया । इमतं ओरल ओए रआ केडा “हो हइ हो”, ओरल रआए तेया: दो शुभ संकेत को मेनेया । ओए को सिंगी दरोम लेका को चेरो बेरो लेडा । येन पोयेता आकिङे आपुते चनाब मटिये रे येम केते कुंडम रे तोपा केडा । नेलेका जोनोमो: कोदो को मेनेया येसु महान झानी को होबाओवा ।
* ओल पढ़ाव – गुरू तिकिंये शिक्षा दो शिशु बारा येते पिये बारा (३ क्लास) जोङ दो सरकारी स्कूल बड्चोम हातु येते उंकुड़ु लेना । प्राइमरी शिक्षा तयोम पुरूईयाँ मिडिल स्कूल रेकिं पढ़ाव केना । सात क्लास रेकिं पढ़ाव तन सोमय मुसिङ हिन्दी मास्टोर पंडित ‘पाइकराए जारिका’ तिकिं “हिन्दी रेया: महत्व” सबेन होन को मिडो मिडो ते पढ़ावयेपे मेताको तना । चिमितं गुरु तिकिं पढ़ाव सोमय सेटेर याना, अकिङ कितेब पढ़ाव पढ़ाव तेकिं हपा याना ।
येन कितेब पड़ा रे ओल लेना….. “जिस समाज की अपनी भाषा, लिपि, साहित्य नहीं है वह समाज बिना सींग और पूंछ के पशु की तरह है ।”
ओकोन जाति रेया: अपना: लिपि चिति, संस्कृति, राजनीति बनो: याना येनको दो बेगर दिरिङ, बेगर चड्लोम कड़ा (पशु) को लेका । ओकोनि:ये जेतन उनुरूम बनो:वा, येन नेगड़ा सुन्दोर को-कोए येरा लेका ।
मास्टोर के मेतइ तना, अयार पा कञ पढ़ावयेआ । मास्टोर कुरकुर ते मोन्डो (स्कूल) येते ओन्डोङ किये । येन मुसिङ गुरू लको तिकिं उड़ु: दिटा (प्रतिज्ञा) केडा ची अञ “हो लिपि हो साहित्य रेया: रचनाया ओन्डो: नेन संसार रे गर्व तेञ काजिये ची आलेया: समाज रेया: अपना: साहित्य, भाषा, गौरवमय हिताहसा (इतिहास) मेना: ओन्डो: आइदा लिपि यो मेना: गेया ।
पुरूईयाँ मिडिल स्कूल येते पास केड् तयोम ग्रामर स्कूल चक्रधरपुर रेकिं पढ़ाव याना । पढ़ाव सोमय राजा नरपति सिङ होनते कुवंर सिङ लो: उपुरूम होबा याना ।राजा ओवा: रेया: लाइब्रेरी रे बुगिन बुगिन कितेब को पढ़ावये तेया: सुयोग नम केडा । येन कितेब कोरे आबुये: हो सनागोम (साहित्य) कोकिङ पढ़ाव नम लेडा । पढ़ाव सोमय तेगे आकिङ दुरं, रूतु ओरोङ ओन्डो: पिरकल (नाटक) रेया: येसु रांसा तइ केना ।
चक्रधरपुर रे मियेड् साधु तिकिं लोओ नपाम ओन्डो: आकिङे: तुमान (आशीर्वाद) ते गुरू तिकिं येसु पुरे: बोंगा कोवा: दाड़े (पेये:) किङ नमलेड् तइकेना । हाई स्कूल रे पढ़ाव तन सोमय आकिङ ओडिया, बंगला ओन्डो: उर्दू किङ पढ़ाव येतो केना । नौ क्लास रे पढ़ाव बागे केते जिला स्कूल चाईबासा रेकिं पढ़ाव रूवा याना । चाईबासा रे जयपाल सिङ तिकिं लोओ उपुरूम तयोम जलंधर, पंजाब येते मेट्रिक किङ पास केडा । ओन्डो: पिटिका (विज्ञान) ते ग्रेजुएशन किङ पढ़ाव केना । येना लोओ ते होम्योपैथिक डिग्री किङ पढ़ाव केना ।
मेनेया को primary schooling दिपिलं….. मेन्डोः गुटु ताः रे मेन्डोः बुड़ा दुबाः कनोआ ओन्डोः जुड़ि को तायेते बोदरा सहेब किङ केया रुआइया….. एन्ते स्कूल बागे तायेते बुड़ा लोः किं जगारा…. जगार जगार ते बुड़ा आडोआ ओन्डोः मिनडोः जोका लेकान दिरि उन्डु रे बोदरा साहेब बोलोआ एन्ता रे व्होंगा बुरु कोलो: पाढ़ाव ताइकेना….. एन लेका जाओ लेका होबा याना…… मास्टर….. पासेया हिजुः लेना ओन्डोः आमः होन चेनाः मेन स्कूल काम कुलिई तानाए मिताइ तना आपु ते ।एन्ते आपु ते लेबेया मेताइया – कागे मास्टर आंञाः होन जाओ गे सेनोः ताना, तिसिंओ सेना कान गेया। एन्ते मास्टर लो जगार बा केंते स्कूल किं सेनोः याना…. येंते जुड़ि होनको कुलेया ना चि बोदरा दो एन गुटु तआ रे जाओ गे मेन्डोः बुड़ा केया रुआइया ओन्डोः केड़ेः किं जागारा मेन केडा। एन्ते सनाम स्कूल रेन होनको मास्टर लोःगेको सेन लेना आये नाम…… एन गुटु गोटा को पांति किया…. चानाब मेन्डोः आयाः जुड़ि गे नेल नाम किया मेन्डोः जोका लेकान दिरि उन्डु बितार रे दुबा काना, एन्ते जुड़ि मेताइया ताना – चिया लाको नेन दिरि उन्डु रे चेनाम चिका तना। लाको – पाड़ाओ तनाञ एला आमो हिजुम ।
जुड़ि सोबेन आपु मास्टर को केया आगु केड कोआ ओन्डोः उदुबा कोताःना । लाको दिरि उन्डु बितार रे दुबा कना।
लाको ओल लेयाना।
मास्टर कुलिकिया – चेनाःम चिका तना नेन दिरि उन्डु रे, लाको – आते मास्टर जाओगे आबेन गे पाड़ाओ ञाः। हजिरा आबेन गे बाइ या।
एन्ते हाजिरा आपु ते – चेक केड रेदो सोबेन दिन हाजिरा मेनाः। मास्टर नेल केते आकादंधा लेना। बिड़ाओ कोरेदो दो आये गे आयार लेना ।
एन लेका एन बुड़ा गे साधु रुप ते हिजुः केते बोदरा सहेब लोः किं जगारा होस्टल रे टाई केन इमितं।
* हुदा (समाज) लागिड् उड़ु: – चक्रधरपुर रे पढ़ाव तन सोमय आपुते तिकिं दनङे याना किङ । देवाँ, सोका कोलो: नपाम चितरिबिला, खण्डगिरि, उदयगिरि, सिरिष बुरू जोंगोल किङ होनोर केना । लिपि विज्ञान, भाषा विज्ञान रेया: अध्ययन के तयोम “वारं चिति” किङ नम लेडा ।
क्योंझर राजा ओवा: किङ बेटा लेना येनता: रेयो येसु पुरा: जानकारी किङ हासोल केडा । धर्म परिवर्तन किङ कोम केडा, हासु तन हो कोकिङ रेड् रानु केना । अंधविश्वास बागे येनायेते सिम मेरोम बोंगा किङ बोन्द लेडा, गोनोङ साति किङ कोम लेडा ।
* नोकरी – डांगुवा पोसी रे रेलवे रेकिं नला केना । येना लोओ ते लिपि लागिडो किङ कुरूमुटु केना । 1939 अक्टूबर चान्डु: रे लिपि किङ ओल पुरे केडा । गोटा दिशुम रे उनुरूम होबा याना । निज स्वाभिमान अर मनवा भावना लागिड् ते नोकोरी किङ बागे केडा ।
*अकड़ा – मसमत 1950 इमतं झींकपानी रे अकड़ा बइयाना । ‘केरसे मुंडा’ 1 एकड़ 20 डिसमील ओते येम केडा । 1954 रे अकड़ा नुतुमे याना ओन्डो: 1976 रे “येटे: तुर्रतुङ पिटिका अकड़ा” रजिस्ट्रेशने याना । गुरू तिकिं अंओ इपिल्ल प्रेस ओकिङ बइ लेडा ।
* आकिङ ओल तड् कितेब को..
१. कोल रूल
२. शिशु हलं
३. बा बुरू बोंगा बुरू
४. हो हयम पहम पुति
५. पोम्पो
६. षड़ा षुड़ा सागेन
७. रघुवंश
८. ऐला ओल इतु उटा
९. हो व्याकरण (हो बकणा)
१०. सार होरा (पिरकल)
1958 रे प्रधानमंत्री जवाहरलाल नेहरू तिकिं लोओ नपाम केनते हो भाषा रेया: जगार, हो संस्कृति, हो लिपि रेया: जानकारी कोकिङ येमाड् किङे । पंडित तिकिङ येसु गेकिङ प्रभावित याना । मसमत् 1976 रे इंदिरागांधी Chief of the chief सम्मान तेकिङ मान केड् किङे । गुरू तिकिं Gold medal ओकिङ नम लेडा । आकिङ राँची आकाशवाणी रेयो किङ नुतुम उतरङ लेना ।
* लिपि मन्यता – वारङ चिति 32 वर्ण 7 जुलाई, 1985 रे नेया राँची विश्वविद्यालय रे जनजातीय भाषा मेनते शामिले याना । मसमत् 1986 रे सिंगड़ा, मयुरभंज रे Education Board बइयाना । येन मुसिङेते नेया रेया: मान्यता लागिड् सरकार ता:रे अरदास आगुओ तना ।
* गोनोए – 1980 पायेतेगे होमो रे हासु को होबा इडेयाना । गुरू तिकिं ओल पढ़ाव रेगे किङ तइयाना । 1986 रे ‘सिदे होरा सुसर अकड़ा’ रेन मरङ गोमके को केया लेड् किङे । जोड़ा रे दुनुब होबा लेना एन तयोम गे हासु पुरा: इदियाना । 67 आइष (उम्र) रे आकिङ आदिवासी हो हुदा सेबा षड़ा ते रूईहर (रविवार) 29 जून 1986 आयुब 6.20 सोमय रे सिंगी हसुर लोओ ते नेन होम्हो किङ बागे केडा ।
* गुरू तिकिं वारङ चिति रेन खोजकर्ता, साहित्यकार, धार्मिक अर समाज सुसर (समाज सुधारक) किङ तइकेना ।
* मुचेड् रे… नआ आबुये गुरू तिकिं वारङ चिति बिति किङ बागेयाड् बुये । नेयागे आबुये: जाति रेया: दोन (धन) तना । नेया अयार पाबु इडिया येनरे येनं गुरू तिकिङे रोवा (आत्मा) रांसावआ ।
पढ़ाव पुरा केड् लागिड् बितियेम ।
💞 हिर्ला वारङ दाड़े 💞
स्रोत- Lalita Bodra
