तुङ् राजा अर पुञ्चुइति 𑢡𑣅𑣜 𑣜𑣈 𑣗𑣃 𑣘𑣛𑣁𑣉 𑣏𑣃𑣌𑣁𑣉 𑣕𑣑𑣁 𑣏𑣂, 𑣁𑣗𑣃𑣁𑣄 𑣔𑣂𑣝𑣃𑣖 𑣔𑣉 𑢾𑣂𑣊 𑣗𑣃𑣆 𑢾𑣂𑣊𑣗𑣙𑣃𑣖 ) 𑣕𑣓𑣁. 𑢳𑣈𑣓 𑣔𑣂𑣝𑣃𑣖 𑣜𑣈 𑣖𑣃𑣓𑣃 𑣔𑣉 𑣞𑣂𑣊 𑣗𑣊𑣝 𑣜𑣈𑣓 𑣌𑣉 𑣜𑣁𑣎𑣁 𑣚𑣈𑣓𑣁. 𑢳𑣈𑣌𑣁 𑣔𑣉 𑣌𑣉𑣙𑣚 𑣜𑣁𑣎𑣁 𑣌𑣉 𑣕𑣆𑣌𑣈𑣓𑣁. 𑢯𑣈𑣓𑣄 𑣏𑣂 𑣓𑣈𑣌𑣉 , 𑣁𑣗𑣃 𑣌𑣉𑣙𑣚 𑣗𑣊𑣝 𑣜𑣈 𑣙𑣗𑣊𑣋𑣁 𑣗𑣃𑣜𑣃 𑣞𑣈𑣗𑣁 𑣝𑣛𑣁 𑣔𑣛𑣈 𑣕𑣈𑣌𑣉 𑣇𑣘𑣓 – 𑣎𑣘𑣓 𑣚𑣈𑣓𑣁.
𑢵𑣂𑣞𑣂𑣊𑣈𑣙 𑣕𑣈 𑣙𑣎𑣜-𑣙𑣎𑣜 𑣗𑣉𑣏𑣉𑣜 𑣝𑣂𑣜𑣖𑣁 𑣞𑣂𑣔𑣁 𑣘𑣉𑣛𑣁𑣙𑣁𑣁𑣒 𑣘𑣂𑣛𑣂 𑣜𑣈 𑣖𑣄 𑣓𑣖 𑣘𑣃𑣄 𑣓𑣖 𑣜𑣁𑣎𑣁 𑣕𑣆𑣌𑣈𑣓𑣁. 𑢳𑣈𑣓 𑣗𑣊𑣝 𑣜𑣈𑣓 𑣜𑣁𑣎𑣁 𑣌𑣉 𑣕𑣅𑣉𑣖 𑣆𑣘𑣓 𑣁𑣘𑣂𑣓 𑣒𑣅𑣑 𑣌𑣉 𑣎𑣅𑣋𑣁 𑣓𑣁. 𑢨𑣓𑣁 𑣕𑣈 𑣁𑣌𑣉 𑣙𑣘𑣘𑣁𑣒𑣂𑣊 𑣜𑣈 𑢯𑣌𑣁𑣙 (𑢯𑣌𑣜𑣔𑣙𑣜𑣘𑣃𑣜), 𑢬𑣈𑣞𑣈𑣀 (𑢬𑣙𑣜𑣞𑣿), 𑢾𑣚𑣂 𑣌𑣃𑣒𑣂𑣄 𑣏𑣂 𑢽𑣁𑣈 (𑢾𑣜𑣆𑣌𑣈𑣚𑣁), 𑢸𑣒𑣁𑣀𑣅𑣁 (𑢮𑣋𑣓𑣓𑣁𑣕𑣙𑣘𑣃𑣜) 𑣉𑣓𑣑𑣉𑣄 𑢶𑣉𑣓𑣉𑣜𑣘𑣃𑣜 (𑢶𑣓𑣉𑣙𑣜𑣘𑣃𑣜) 𑣌𑣉 𑣕𑣓𑣁𑣙𑣎𑣉 𑣚𑣈𑣑𑣁 𑣕𑣅𑣉𑣖 𑣉𑣛𑣉𑣄 𑣋𑣈 𑣌𑣉 𑣙𑣒𑣂𑣊 𑣞𑣈𑣜𑣜 𑣌𑣈𑣑𑣁. 𑢯𑣂𑣚𑣂𑣌𑣁 𑢬𑣈𑣜𑣁, 𑢦𑣏𑣄, 𑢮𑣃𑣆𑣕𑣂 , 𑢯𑣉𑣒𑣁𑣓𑣋𑣜𑣁 𑣈𑣖𑣓 𑣓𑣌𑣁𑣜𑣁𑣎𑣂 𑣅𑣓𑣁.
𑢶𑣉𑣓𑣉𑣜𑣘𑣃𑣜 𑣜𑣈 𑢯𑣃𑣛𑣁𑣖𑣐𑣂 𑣜𑣁𑣎𑣁𑣈 𑣕𑣆𑣌𑣈𑣓𑣁. 𑢦𑣓𑣂𑣄 𑣅𑣄 𑣁𑣆𑣅𑣁 𑣜𑣁𑣓𑣂 𑣌𑣉 𑣕𑣆𑣌𑣈𑣓𑣁. 𑢹𑣃𑣛𑣂𑣊 𑣇𑣕𑣜 𑣜𑣁𑣓𑣂 𑣔𑣉 𑢯𑣉𑣒𑣁𑣓𑣋𑣜𑣈𑣈 𑣕𑣂𑣓𑣂𑣄 𑣕𑣆𑣌𑣈𑣓𑣁. 𑢦𑣓𑣂𑣄 𑣆𑣝𑣃 𑣜𑣈𑣊𑣋𑣈𑣄 𑣉𑣛𑣄 𑣌𑣃𑣛𑣂𑣄 𑣕𑣆𑣌𑣈𑣓𑣁. 𑢷𑣊𑣝 𑣉𑣛𑣊𑣋𑣈 𑣕𑣌𑣉 𑣞𑣈𑣗𑣈 𑣏𑣂 𑣏𑣉𑣚𑣉𑣓 𑣔𑣉 𑣕𑣆 𑣌𑣈𑣓𑣁.
𑢶𑣃𑣞𑣂𑣊 𑣜𑣁𑣎𑣁 𑣞𑣀𑣋𑣁𑣜𑣈𑣄 𑣞𑣈𑣓𑣉𑣄 𑣅𑣓𑣁. 𑢼𑣁𑣎𑣁’𑣄 𑣁𑣁𑣀𑣔𑣈 𑣗𑣈𑣋𑣜 𑣜𑣁𑣓𑣂 𑣌𑣃𑣖𑣁𑣕𑣈 (𑣙𑣕𑣉𑣖 𑣕𑣈𑣅𑣄 𑣙𑣈𑣜𑣈𑣚) 𑣚𑣉𑣉𑣄 𑣌𑣂𑣊 𑣎𑣘𑣘𑣁𑣋𑣜 𑣅𑣓𑣁. 𑢼𑣁𑣎𑣁’𑣄 𑣖𑣈𑣑 𑣓𑣈𑣓𑣈𑣚 𑣜𑣈 𑣁𑣓𑣑𑣈𑣓 𑣒𑣄 𑣙𑣉𑣗𑣁𑣅𑣓𑣁. 𑢬𑣃𑣜𑣌𑣃𑣜 𑣕𑣈 𑣜𑣁𑣎𑣁 𑣜𑣁𑣓𑣂 𑣋𑣉𑣈 𑣕𑣈𑣅𑣄 𑣖𑣉𑣓𑣈 𑣌𑣈𑣑𑣁. 𑢷𑣉𑣜𑣉 𑣗𑣂𑣌𑣉𑣚 𑣕𑣈 𑣜𑣁𑣓𑣂 𑣓𑣂𑣜 𑣅𑣓𑣁. 𑢴𑣃𑣝𑣂𑣅𑣁 𑣗𑣈𑣋𑣜 𑣜𑣈𑣅𑣉𑣙 𑣋𑣈𑣄 𑣓𑣂𑣜 𑣇𑣌𑣃 𑣎𑣓𑣁.
𑢹𑣖𑣗𑣚 𑣚𑣅𑣁 𑣚𑣃𑣅𑣃𑣄𑣜𑣈 𑣜𑣁𑣓𑣂 𑣈𑣊𑣋𑣁 𑣁𑣘𑣃 𑣞𑣃𑣗𑣁 𑣋𑣈𑣄 𑣞𑣃𑣜 𑣅𑣓𑣁 . 𑢼𑣈𑣊𑣋𑣈𑣄 𑣉𑣛𑣄 𑣕𑣃𑣁𑣖 𑣞𑣀𑣋𑣁 𑣏𑣈𑣕𑣓 𑣜𑣈𑣋𑣈𑣄 𑣒𑣅𑣑 𑣏𑣘𑣜𑣁 𑣅𑣓𑣁. 𑢧𑣛𑣂 𑣉𑣛𑣊 𑣈𑣓 𑣞𑣀𑣋𑣁 𑣏𑣈𑣕𑣓 𑣜𑣈 𑣙𑣉𑣓 𑣎𑣉𑣓𑣉𑣖 𑣅𑣓𑣁. 𑢦𑣓𑣂𑣄 𑢵𑣃𑣊 𑣜𑣈𑣌𑣉 𑣞𑣌𑣂 𑣌𑣂𑣄 𑣅𑣁.
𑢹𑣜𑣁 𑣞𑣀𑣊𑣈𑣓 𑣕𑣈 𑢵𑣃𑣊 𑣎𑣒𑣂 𑣗𑣗𑣁 𑣌𑣉 𑣙𑣉𑣜𑣉 𑣆𑣜𑣂 𑣌𑣂𑣄 𑣅𑣁. 𑢳𑣈𑣚 𑣞𑣈𑣊𑣋𑣈𑣜 𑣕𑣈 𑣇𑣜𑣂𑣄 𑣌𑣈𑣛𑣁 𑣋𑣉𑣙𑣒 𑣜𑣈𑣌𑣉 𑣒𑣈𑣌𑣁𑣉 𑣌𑣂𑣄 𑣅𑣁. 𑢨 𑣋𑣉𑣙𑣒 𑣙𑣗𑣊𑣋𑣁 𑣞𑣈𑣗𑣁 𑣆𑣝𑣃 𑣞𑣉𑣅𑣕𑣁 𑣕𑣈𑣄 𑣏𑣚𑣁𑣉 𑣌𑣈𑣑𑣁. 𑢽𑣂𑣍 𑣙𑣗𑣊𑣋𑣁’𑣄 𑣝𑣅𑣑 𑣌𑣉𑣛𑣊 𑣙𑣉𑣗𑣁 𑣅𑣓𑣁. 𑢹𑣗𑣊𑣋𑣁 𑣙𑣗𑣊𑣋𑣁 𑣗𑣃𑣜𑣃 𑣖𑣌𑣉 𑣝𑣙𑣁 𑣅𑣓𑣁. 𑢬𑣃𑣚𑣁 𑣋𑣃𑣘𑣂 𑣖𑣉𑣐𑣉𑣅 𑣌𑣉𑣈 𑣎𑣃𑣛𑣂 𑣌𑣈𑣑𑣁. 𑢬𑣃𑣚𑣁 𑣌𑣉 𑣚𑣉𑣉𑣄 𑣇𑣜𑣂𑣄 – 𑣌𑣈𑣛𑣁 𑣋𑣉𑣙𑣒 𑣌𑣈𑣑 𑣌𑣉𑣁’𑣄𑢨 , 𑣖𑣉𑣐𑣉𑣅 𑣌𑣉’𑣄 𑣔𑣈𑣀𑣋𑣁 𑣕𑣈 𑣋𑣈𑣙𑣅𑣁 – 𑣌𑣃𑣖𑣁𑣅𑣁 𑣔𑣖𑣁𑣈 𑣕𑣂𑣅𑣜 𑣌𑣈𑣑𑣁. 𑢯𑣂𑣜𑣃 𑣏𑣜𑣂𑣄 𑣕𑣈 𑣜𑣃𑣃 𑣝𑣗𑣔 𑣌𑣈𑣑 𑣕𑣈 𑣋𑣉𑣒𑣁 𑣔𑣂𑣝𑣃𑣖𑣈𑣄 𑣔𑣉𑣌𑣉𑣚 𑣌𑣈𑣑𑣁. 𑢨𑣓𑣌𑣁 𑣕𑣈 𑢶𑣉𑣓𑣉𑣜𑣘𑣃𑣜 𑣜𑣁𑣎𑣁 𑣎𑣌𑣈𑣄 𑣚𑣗𑣃𑣄 𑣌𑣂𑣄 𑣅𑣁. 𑢾𑣂𑣅𑣃𑣄 𑣁𑣔𑣉 𑣗𑣗𑣁 𑣙𑣈𑣜 𑣎𑣌𑣈𑣜 𑣌𑣃𑣚𑣁 𑣌𑣉 𑣕𑣈𑣋𑣈𑣄 𑣏𑣚𑣁𑣉 𑣌𑣈𑣑𑣁. 𑢨 𑢾𑣂𑣊 𑣌𑣃𑣚𑣁 𑣜𑣈𑣄 𑣁𑣞𑣁𑣙𑣜𑣂𑣓𑣁 𑣗𑣊𑣝 𑢾𑣂𑣊 𑣗𑣊𑣝 𑣇𑣖𑣂𑣆 𑣅𑣓𑣁.
𑢡𑣝𑣛𑣁 𑣎𑣉𑣛𑣊 𑣝𑣂𑣜𑣖𑣁 – 𑣝𑣂𑣜𑣖𑣁𑣈 𑣎𑣉𑣖𑣝𑣃𑣆𑣖 𑣌𑣈𑣑𑣁. 𑢴𑣂𑣝𑣃𑣖 𑣘𑣛𑣄 𑢨 𑣕𑣓𑣁𑣎 𑣌𑣈𑣑𑣁 . 𑢡𑣏𑣁𑣜 𑣗𑣂𑣏𑣁𑣜 𑣚𑣋𑣂𑣑 𑣒𑣅𑣑 – 𑣒𑣅𑣑 𑣌𑣉𑣜𑣈 𑣘𑣍𑣏𑣆𑣕𑣂 𑣌𑣉𑣈 𑣗𑣆𑣌𑣈𑣓𑣁. 𑢼𑣆𑣎 𑣜𑣈𑣅𑣄 𑣎𑣅𑣋𑣁 𑣔𑣉 𑢯𑣉𑣒𑣁𑣓𑣋𑣜𑣁 𑣓𑣃𑣕𑣃𑣖 𑣜𑣈 𑣏𑣉𑣒𑣁𑣓𑣁𑣋𑣘𑣃𑣜𑣈𑣄 𑣇𑣖𑣂 𑣌𑣈𑣑𑣁.𑢸𑣍𑣏𑣁𑣆𑣕𑣂 𑣗𑣑 𑣗𑣂𑣏𑣁𑣜 𑣎𑣉𑣙𑣊 𑣘𑣍𑣏𑣁𑣆𑣕𑣂 𑣇𑣖𑣂 𑣅𑣓𑣁. 𑢷𑣂𑣆𑣏𑣜 𑣖𑣉𑣐𑣈 𑣌𑣉 𑣔𑣉 𑣘𑣃𑣍𑣏𑣃 𑣌𑣉 𑣖𑣈𑣕𑣁𑣑𑣁.𑢶𑣉𑣐𑣈 𑣌𑣉’𑣄 𑣞𑣈𑣕𑣉𑣖 𑣗𑣂𑣕𑣂 𑣔𑣉 𑣘𑣍𑣏𑣁 𑣖𑣈𑣓𑣕𑣈 𑣌𑣉 𑣌𑣎𑣂 𑣌𑣈𑣒𑣈𑣄 𑣌𑣈𑣑𑣁. 𑢸𑣃𑣍𑣏𑣃 𑣋𑣃𑣞𑣂𑣅𑣁 𑣌𑣉 𑣔𑣉 𑣙𑣕𑣃 𑣖𑣃𑣓𑣑𑣁 𑣌𑣉 𑣖𑣈𑣕𑣁𑣂 𑣅𑣁. 𑢨𑣘𑣘𑣈𑣞𑣈𑣜 𑣉𑣓𑣑𑣉𑣄 𑣋𑣉𑣘𑣘𑣉𑣈 𑣜𑣈𑣅𑣄 𑣗𑣉𑣎𑣁 𑣔𑣉 𑣖𑣐𑣁𑣌𑣂 𑣌𑣉’𑣄 𑣕𑣂𑣆𑣙 𑣜𑣈𑣄 𑣞𑣉𑣖𑣘𑣁𑣉 𑣌𑣈𑣑𑣁. 𑢨𑣓 𑣚𑣈𑣌𑣁 𑣕𑣈 𑣌𑣖𑣂 𑣇𑣖𑣂 𑣉𑣛𑣊 𑢷𑣝𑣃𑣆, 𑢾𑣓𑣑𑣂 , 𑢫𑣉𑣓𑣑𑣆, 𑢾𑣂𑣜𑣔𑣁𑣜, 𑢶𑣜𑣌𑣂 , 𑢡𑣓𑣑𑣂𑣅𑣁, 𑢴𑣁𑣊𑣋𑣜 𑣁𑣔𑣉 𑢱𑣃𑣑𑣑𑣁 𑣎𑣌𑣈𑣄 𑣖𑣈𑣕𑣑 𑣌𑣉𑣁. 𑢸𑣉𑣒𑣁𑣔𑣁𑣜 𑣌𑣉𑣔𑣉 𑣙𑣕𑣃 𑣕𑣚𑣁 𑣜𑣈 𑣑𑣈𑣌𑣈 𑣔𑣜𑣃 𑣌𑣃𑣓𑣒𑣃 𑣗𑣂𑣑 𑣌𑣈𑣑 𑣕𑣈 𑣗𑣈𑣓𑣒𑣁 , 𑣗𑣈𑣑 𑣉𑣓𑣑𑣉𑣄 𑣖𑣃𑣌𑣃𑣒 𑣕𑣈 𑣕𑣃𑣖𑣁𑣓 𑣌𑣈𑣑 𑣌𑣉𑣁𑣙. 𑢫𑣉𑣈 𑣅𑣓 𑣌𑣉 𑣙𑣕𑣃 𑣌𑣃𑣒𑣂 𑣌𑣜𑣈 𑣙𑣉𑣜𑣁 𑣙𑣘𑣘𑣁𑣒𑣂𑣊 𑣗𑣂𑣑 𑣔𑣂𑣜𑣂 𑣜𑣈 𑣒𑣉𑣀𑣅𑣉𑣚 𑣚𑣉𑣉𑣄 𑣕𑣈𑣄 𑣖𑣆𑣓 𑣖𑣜𑣀 𑣌𑣈𑣑𑣁.
𑢵𑣅𑣉𑣖 𑣔𑣉 𑣋𑣉𑣒𑣁 𑢯𑣉𑣒𑣁𑣓𑣁𑣋𑣘𑣃𑣜 𑢯𑣇𑣜𑣁𑣞𑣂,𑢷𑣃𑣓𑣑𑣃, 𑢵𑣖𑣁𑣛, 𑢹𑣞𑣁𑣔𑣄 𑣉𑣓𑣑𑣉𑣄 𑢳𑣋𑣃𑣜𑣂 𑣘𑣂𑣛𑣂 𑣜𑣈𑣄 𑣙𑣒𑣂𑣊 𑣓𑣃𑣕𑣃𑣖 𑣌𑣈𑣑𑣁.
𑢵𑣃𑣊 𑣜𑣁𑣎𑣁’𑣄 𑣁𑣘𑣃𑣕𑣈 𑣓𑣃𑣕𑣃𑣖 𑣕𑣈 𑢯𑣇𑣜𑣁𑣞𑣂, 𑢨𑣊𑣋𑣁 𑣓𑣃𑣖𑣃 𑣕𑣈 𑢳𑣋𑣃𑣜𑣂 𑣘𑣂𑣛𑣂𑣄 𑣇𑣖𑣂 𑣌𑣈𑣑𑣁. 𑢨𑣊𑣋𑣁’𑣄 𑣌𑣂𑣚𑣂 𑣙𑣞𑣁𑣔𑣄 𑣖𑣆𑣓 𑣖𑣜𑣀 𑣜𑣈 𑢹𑣞𑣁𑣔𑣄 𑣘𑣂𑣛𑣂𑣄 𑣇𑣖𑣂 𑣌𑣈𑣑𑣁. 𑢵𑣕𑣁𑣕𑣈 𑣁𑣕𑣀 𑣔𑣜𑣉𑣖 𑣌𑣈𑣓 𑣚𑣈𑣌𑣁 𑣕𑣈 𑢷𑣃𑣓𑣔𑣃’𑣄 𑢷𑣃𑣓𑣑𑣃 𑣌𑣃𑣖𑣁𑣕𑣈’𑣄 𑣖𑣉𑣙𑣕 𑣖𑣜𑣀𑣜𑣈 𑢵𑣖𑣗𑣜𑣁’𑣄 𑣖𑣈𑣓𑣌𑣓𑣈𑣄 𑢵𑣖𑣁𑣛𑣁 𑣌𑣈𑣑𑣁.
अयर रे बु पड़ाव चुकव तडा चि, अबुव: दिषुम दो सिङबुइ (सिंहभूम) तना। नेन दिषुम रे मुनु दो सिङ बोङ्ष रेन्को राजा लेना। नेको दो को’ल राजा को तइकेना। चेन: चि नेको, अबु को’ल बोङ्ष रे बोङ्गा बुरु सेबा षड़ा दड़े दुलुब् तेको उपन जपन लेना।
तिसिङे ते हजर हजर बचर षिर्मा सिदा पोड़ाहाट पिड़ि रे म: नम् पू नम् राजा तइकेना। नेन बोङ्ष रेन राजा को तयोम इपन अपिन टयड् को जयगा ना। एन्का ते अको हप्पाटिङ रे चक्हा (चक्रधरपुर), केसें (खरसवां), सलि कुटि:इ् चि षै:ए् (सरइकेला), पटांया (जगन्नाथपुर) ओन्डो:अ् मोनोरपुर (मनोहरपुर) को तन्हाजो लेडा तयोम ओन्डो:अ् गे को हटिङ सेर्र् केडा। चिलिका केरा, इच:, जुइति, चोटानगरा एमन नकाराजि यना।
मोनोरपुर रे चुड़ामणि नुतुम राजाए् तइकेना। इनि: य: अइया रानि को तइकेना। हुड़िङ उतर रानि दो चोटानगरै तिनि:इ् तइकेना। इनि:इ् इषु रेङ्गे:ए् ओड़: कुड़ि:इ् तइकेना। बोङ्ष ओड़ङ गे तको सेबे चि चोलोन दो तइकेना।
मुसिङ राजा संगरे:ए् सेनो:अ् यना। राजा:अ् आंदे बेगर रानि कुमाते (हतोम तेय: हेरेल्) लो’: किङ जप्पागर यना। राजा: मेड् नेनेल रे अन्डेन ट: होबा यना। कुर्कुर ते राजा, रानि गो:ए् तेय: मोने केडा। बोरो बिकोल ते रानि निर यना। दुषिया बेगर रेयोह गे:ए् निर उकु जना।
हम्बल लया लुयुरे रानि एङ्गा – अपु सुबा गे:ए् सुर यना। रेङ्गे:ए् ओड़: , तुवम सङ्गा चेतन रेगे:ए् टैड् चपरा यना। उड़ि ओड़ङ एन सङ्गा चेतन रे होन जोनोम यना। इनि:इ् तुङ् रेको सकि किइ् या। हरा सङेन ते तुङ् जटि बबा को होरो इरि कि:इ् या। नेल सेङ्गेर ते उरि:इ् – केड़ा गो’ट रेको टेकाओ कि:इ् या। अए् गो’ट बोङ्गा सेबा इषु सोयेता ते:ए् चलाव केडा। षिञ् वोङ्गा: षैड् कोड़ोङ् होबा यना। वोङ्गा वोङ्गा मको षहा यना। कुला गुपि मोणेय को:ए् जुड़ि केडा। कुला को लो’:अ् उरि:इ् – केड़ा:ए् गो’ट केड् कोवा, मोणेय कोव: देंगा ते गेह्या – कुमाया दमा:ए् तियर केडा। चिरु चरि:इ् ते रु षबद् केड् ते गोटा दिषुमे:ए् दोकोल केडा। एन्का ते मोनोरपुर राजा जके:ए् लबु:उ् कि:इ् या। सियु:उ् अदो बबा हेर जकेर कुला को तेगे:ए् चलाव केडा। अ:ए् सिङ कुला रे:ए् अस्वरिना, बोङ्ष सिङ बोङ्ष उमि यना।
अषाड़ा ओड़ोङ् षिर्मा – षिर्मा:ए् जोमषुइम् केडा। दिषुम पड़ा:ए् तनाज केडा। अचार बिचार लगिड् टैड् – टैड् कोरे पञ्चइति को:ए् बइ केना। रइज रेय: जयगा दो चोटानगारा नुतुम रे छोटानागपुरे:ए् उमि केडा। पञ्चइति बड् बिचार जो’ङ पञ्चाइति उमि यना। बीचर मोणे को दो पुञ्चु को मेताडा। मोणे कोव: सेतोम बिति दो पञ्चा मेन्ते को कजि केटे:ए् केडा। पुञ्चु गुसिया को दो हतु मुन्डा को मेत:इ्या। एप्पेसेर ओन्डो: गोप्पो:ए् रेय: बोजा दो मणाकि कोव: तीह रे:ए् सोम्पव केडा। एन लेका ते कमि उमि ओड़ोङ् बिषुइ, सन्डि, गोन्डइ, सोरदार, मर्की,अन्डिया, दाङ्गर्र् अदो डुड्डा जके:ए् मेतड् कोवा। पोटा दार कोदो हतु तलारे डेके दरु कुन्टु बिड् केड्ते बेन्टा, बेड् ओड़ो:अ् मुकुट् ते:ए् तुमान केड् कोवा। गो:ए् यन को दो हतु कुटि करे होरा हप्पाटिङ् बिड् दिरि रे टोंयोल लो’:अ् ते:ए् मइन मरं केडा।
तयोम दो गोटा चोटानागपुर चौरासि, बुन्डु, तमाड़, हसाद: ओन्डो:अ् नगुरि पिड़ि रे:ए् हटिङ् नुतुम केडा।
तुङ् राजा: अपुते नुतुम रे चौरासि , एङ्गा नुमु ते नगुरि पिड़ि:इ् उमि केडा। एङ्गा: किलि हसाद: मइन मरं रे हसाद: पिड़ि:इ् उमि केडा। तताते अतं दरोम केन लेका ते बुन्दुव: बुन्डु ओन्डो:अ् कुमाते य: मोहत् मरं रे तम्बरा: मेन्कने:ए् तमाड़ा केडा।
ओतोल्ल् – को’ल लको बोदरा।
सगइयन पुति :- षड़ा षुड़ा संङेन।
