Lupu kope halam buli king
Lupu kope halam buli king बरों’ हड़म-बुड़िकिञ टइकेना। अकिञ एसेकरगेया, होन-गंड़ाकोदो बङकोवा। जा’-लेकातेकिञ असुल-अपासुलतना। मुसिञदो रेंगेः-दिनरेयः कजि नेलेका होबायाना, पसा’कोकिञ ताउइः केड्ते अताकेडाकिञ ओन्डो: किञ लुपुः केडा। एन्तेकिञ मेनेतना, “ना’: दो सेका’याना, ओड़ा-ले’नो: वालङ, एने’तेलङ जोमेया। मिडों’लङ ओड़ानरेदो मिडों’दो ओवः लङ होरो अन्ताः। चनब मिसा-तेलङ जोमेया।”
बुड़ि एरादो ओवः-रचारेयः पइटिको अउरिः चबाएतेदो बुड़ा हों’गे अयेरतेदो ओड़नते सेनोः याना। बुड़ा हो’ अंजा’गे ओड़ाबा’ तबकेनें ‘तेः हुजुः-उरालेना। एन तयोम एरातनिः सेनोः याना। एराकोवः ओड़ा मेतातना, रिडेनतन-नोवानतनाएः, सिंगि जकेडे: तिकिन-रेना’किःया। हड़म होड़ोदो रेंगे: चबाइतना, लेल-उजुः केन लेल-उजुः केनाएः। एन्तेः मेनेतना, “नेन बुड़ि एरा निमिनोः गे कएः हुजुःवा, रेंगे:ते निमिन रेंगे: चबाञतना, मि आ’-लेकारेयों’ लुपुःञ जोम अन्ता’या।” एन्काएः मेनकेड्ते मि आ’ लुपुःइः कपः तडा। लुपुः मेनें’ड्गेया अंजा’दो का उडो:वा, चिमिनरे लोवमलें’नोः एनङ। एन्ते कोपेयाकडे’ते सिलपिञ कोचारेः हेपड्-उकुवाकना। एन गा’ड़िगे बुड़ि एरा बेटालेडा। ओवः कोएः लेलबा’ लेलबा’किःया, बुड़ा हो’ बंगायः। “ओकोना नेन बुड़ादोएः सेनोः याना, अञदो निमिन रेंगे: अतना, मि आ-लेका लुपुःञ जोम अन्ता’तः” मेनकेड्ते बुड़ि एराव मि आ’ लुपुःइः सोंदेकेडा। एन्ते अंजा’ का लोवामो: तनरेदो बुड़ा हो’ जा’ बेटा-तञगेया मेनकेड्ते एन सिलपिञ कोचागेः सेनोः याना। हेपड्-उकुले’नोः वाजेः मेनेरेदो बुड़ा हो’एः नमतःया। बुड़ा हो’ नाः जकेड् अउरिः उडेया, बरो’ जकेड् लुपुः किञ कोपेयाकडा, लंदादो ककिञ सा’तिञकेडा। बरो’ जकेङ्किङ्कञ लंदाकेडा, ओन्डोः कोपेयाकड् लुपुःकोकिञ पुर-ओं’:ल-चबाकेडा। चनब चिकानः किञ मेपेना, “बरों’ जकेड् हा’इः लुपुः कोपेकिञ, जा’नःदो कलङ कपाजिया, उकु-दनङते जोमेतेयः दो का बुगिया” किञ मेपेनेयन्ते चनबदो मिसातेगे पसा’ लुपुः किञ जोमकेडा।
स्रोत – हो दिषुम हो होनको – 7
