Ho Khanee Tuyu ondoh Deda Muyu
अम्बारोबेयनतेः डेडा मुयु जेटे सिंगि आ’:- एड़ः दिन “दोकाञ गड़ा परोमपा’ बलेः-बलेः तसड्कोरेयों’ञ अतिञ-उजुःवा” मेन्ते जावगे अएः सुमड् अडेयनरेगेः सेनोःवा। डेडा मुयु गोटा सिंगि गड़ापा’रेगेः टइना, तेतङकी-तेतङकीगे गड़ा दःएः नूवा, अयुब एनङ ओवःदोएः हुजुःवा। मुसिञ बेतारङदो तिकिन सिः-सोए: इमिता मरङ बुंडा तुयुदो एन्तः दः नूतेः हुजुःलेना। मुयु एनेःगे दःएः नू-अन्ता’तना। मुयु जोमी लगिड् तुयु कुसुरेः ओ’:लेतना, “डेडा मुयु चिकनरेयः अञ नूइतन दःअम बोड़ाकेडा, एसा लेंगा तीतेञ चपाड़ामेया, बटि-तबमेयाञ; मर बोदे डुड्डा हिसिर कलगि-सकामाकनाए: मेताञमे” एः मेताइतना। मुयु, अउरि दःञ नू-अन्टेलें’नो:वाएः मेन-उराइतना। दःएः नू-सेका’केड्रेदो ओन्डोःगे तुयुदो, “मर डेडा मुयु, डुड्डा हिसिंर कलगि-सकामाकनाए: मेताञमे, बनरेदो लेंगा तीतेञ चपाड़ामेया बटि-तबमेयाञ”ए: मेताइतना। एन्ते डेडा मुयु ओन्डोःगे, अउरि तुयु दःञ परोमलें’याएः मेताइतना। मुयु दःएः परोमकेड्रेदो तुयु एन्कागे, “मर डुड्डा हिसिर कलगि-सकामाकनाए: मेताञमे, बनरेदो लेंगा तीतेञ चपाड़ामेया, बटि-तबमेयाञ”एः मेनेतना। ओन्डोः गे मुयु, “कागे अउरि नेन मुटुञ तयोमलें’या, एनें’तेञ कजीया”एः मेताइतना। डेडा मुयु पोचनतेयः होरादोएः उड़: मुलियाकडा, एन्ते मुटुइः तयोमकेड्रेदो चड्लोम बिड्डङाकडे’ते “तुयु दुबुइ दिँगर-दोंगोर, तुयु दुबुइ दिंगर-दोंगोर” मेन्ते एरङ एरङते एड्का-लेकाएः निरतना। तुयु
ककीयाकएःगेयाएः। एन्तः जपः नोःतःरेगे निलिकोदो ओते जपः दरु बुटारेको दकातडा। मुयु एन्कोदो अयेरतेगेः चिरगलतड्कोवा। एन मुलितेगेः निरतना; एन्तःएः बेटाकेड्रेदो निलिकोएः पदुगडातूड्कोवा। अएःमा ओटङतनगेः निरेयाना, तुयु चनब-चनबतेः निराकड्गेया। चिनः ओन्डोः तुयु, निलिको जुडि-तोर-तबकिःया, मेड्पा’व कको तां’एः किःया। तुयु निरगे कएः दइयाना, निलिको तू-मों’-चबाकिःया। चनबदो तुयु, “बपारी गोड़े डेडा मुयु हगाको निमिनको तूतूवामेन्ते कञ अटकरलेड्” मेन्तेः हयकेन-हयकेना।
बरसिञ-अपे’-मा’-लेकारेदो तुयु निलिको तूकिः तेयःएः मतायाना। एन्ते मुसिञदो होरा कुटिरे दुबाकन्तेः हए-हए’तना। एन होराते मिडों’ कुंकल चटुइः गोः-उजुःतडा। एन्तःएः बेटालेग्रेदो तुयु मों’वाकन-मता’कनतेयः कोए: उदुबाइतनलो: एः कजियाइतना, “अमा तलङ कुंकल होन, निमिन दुकुरित्र; मियड् कंडा एमातूञमे, गव-मतारेयों’ञ पुसिः-उंडितेया।” एन्ते हपुइ कुंकल होन तुयु मियड् कंडाएः एमातूइःया। चनबदो तुयु मता’कन गवकोएः पुसिः केड्ते कंडारेः पेरे: केडा ओन्डोः बुगि-लेकातेः बेड्-केसेड्केडा। तुयु उड़ः मुलिकेडाएः गपातेरदो एना इड्केड्ते “गोतोमकोरें’ गोतोमको” मेन्ते हतु-सइः तिनुलेतना। एन्ते हो’कोदो “इदु हा’इः अपे तुयु जतिको एसुपे चकाडा” को मेताइया। का’गेया कञ चकाडा, नेनादो गोतोमगे: मेताकोवा। चिकानः तेम एमेयाको मेताइरेदो एंगा मेरोमतेञ एमेयाएः मेताकोवा। चनबदो मियड् ओवः रेनको हयायनते इडेतेयः को उड़ः केडा। मेरोमको एमःएते तुयु मेताकोतना, नेन गोतोमदो रचापा’कोरेदो अलोपै रा’या, बनरेदो अंजा’को सोवन-चिरगलपेया ओन्डोः हों’ को हयावो: तेको रे: पेया।
तुयु मेरोम गोःकिःते लंदा-लंदातेः सेनोः याना; तिसिञदो बुगिन जोमेयःञ नमकेडामेन्ते एसुइः रां’सायाना। मुसिञदो गोतोमबु जोमेयाको मेनेतन्ते एन ओवः रेनको सबेन ओवः बितररेको बोलोयाना ओन्डोः हुड़का केसेडाकनें’ते ना’: दोको रा’एतना। रा’केङ्ग्रेगेको एड्का-लेका सोवानेयाना। मेन्दो गोतोमगेमेन्तेको सरियाकनतेदो कको ओ’ : लतना, एटः हों’को अटाकरेयाको मेनेतना। चनबदो एना गोटा ओवःरे गुमुरवयाना ओन्डोः एन सोवनते सबेनको गोए: उतारडेयाना। एन्लेका सिदा तुयुको, हो’को जकेड्ङ्को चकड्-लेड्ङ्कोवा।