Aanra meya lang siyu me
𑢡𑢡𑢠𑢼𑢡 𑢶𑢨𑢥𑢡𑢺𑢠 𑢴𑢩𑢺𑢠 𑢾𑢢𑢥𑢣𑢤 𑢶𑢨
आंरा मेयालं दोलं सियु: मे
𑢡𑣀𑣀𑣉𑣄 𑣁𑣅𑣜 𑣖𑣂𑣆 – 𑣖𑣂𑣆𑣜
𑣓𑣈𑣚𑣉𑣄 𑣘𑣃𑣜𑣄, 𑣌𑣁 𑣋𑣈 , 𑣙𑣂𑣂𑣜 – 𑣙𑣂𑣂𑣜
𑣞𑣂𑣅𑣃𑣄 𑣌𑣑𑣁 𑣌𑣉, 𑣕𑣉𑣚 𑣉𑣚𑣚 𑣕𑣁𑣌𑣉𑢶
𑣁𑣁𑣀𑣜𑣁 𑣖𑣈𑣅𑣁𑣚𑣀 𑣔𑣉𑣚𑣀 𑣞𑣂𑣅𑣃𑣄 𑣖𑣈!
𑢼𑣉𑣉 𑣗𑣃𑣞𑣃𑣄 𑣗𑣉𑣈𑣅𑣁𑣌𑣉𑢶, 𑣚𑣂𑣎𑣃𑣖 𑣆𑣓𑣃𑣊𑣁𑣌𑣉 𑣞𑣉𑣌𑣉𑣈𑣅𑣁 𑣌𑣉𑢶,
𑣌𑣁𑣜𑣈 𑣞𑣃𑣆𑣑𑣁 𑣌𑣉𑢶 𑣞𑣉𑣄 𑣚𑣃𑣘𑣃𑣄,
𑣞𑣂𑣂𑣅𑣃𑣄 𑣜𑣈𑣅𑣉𑣙 𑣌𑣉 𑣞𑣈𑣓𑣈 𑣎𑣈𑣀𑣅𑣉𑣑 – 𑣎𑣉𑣘𑣉𑣑 𑣏𑣂 𑣏𑣌𑣃𑣑 – 𑣏𑣌𑣃𑣑
𑣁𑣁𑣀𑣜𑣁 𑣖𑣈𑣅𑣁𑣚𑣀 𑣔𑣉𑣚𑣀 𑣞𑣂𑣅𑣃𑣄 𑣖𑣈!!
𑣁𑣁𑣀𑣜, 𑣓𑣀𑣋𑣚𑣂, 𑣗𑣅𑣜 𑣉𑣚𑣚𑣈𑣖𑣈𑣅𑣁
𑣌𑣑𑣁 𑣎𑣃𑣁 𑢶 𑣈𑣕𑣉𑣅 𑣜𑣈𑣔𑣉 𑣁𑣀𑣜 𑣌𑣂𑣍 𑣖𑣈𑣅𑣁,
𑣋𑣜𑣉𑣎 𑣖𑣈𑣓𑣄 𑣜𑣃𑣌𑣁, 𑣙𑣞𑣂 , 𑣙𑣓𑣁𑣙𑣞𑣁 𑣎𑣒𑣁 𑣞𑣗 𑣕𑣉𑣜𑣞𑣁𑣁 𑣌𑢶 𑣓𑣈𑣅𑣁,
𑣁𑣁𑣀𑣜𑣁 𑣖𑣈𑣅𑣁𑣚𑣀 𑣔𑣉𑣚𑣀 𑣞𑣂𑣅𑣃𑣄 𑣖𑣈!!!
𑢨𑣕𑣉𑣁𑣌𑣑 𑣜𑣈𑣔𑣉 𑣈𑣚𑣁 𑣖𑣜 𑢶 𑣕𑣈𑣋𑣈 𑣁𑣁𑣀𑣜 𑣎𑣉𑣊 𑣖𑣈,
𑢩𑣌𑣉𑣓𑣂𑣄 𑣈𑣕𑣉𑣖 ? 𑢩𑣌𑣉𑣓𑣂𑣄 𑣌𑣉𑣍𑣈 ? 𑢳𑣈𑣅𑣁 𑣙𑣉𑣀 𑣏𑣂𑣓𑣁 𑣎𑣉𑣊 𑣖𑣈,
𑣌𑢶 𑣆𑣕𑣃𑣁𑣌𑣑 𑣜𑣈 𑣙𑣉𑣀, 𑣁𑣚𑣉𑢶 𑣇𑣞𑣓 𑣆𑣕𑣃𑣓 𑣖𑣈,
𑣁𑣁𑣀𑣜𑣁 𑣖𑣈𑣅𑣁𑣚𑣀 𑣔𑣉𑣚𑣀 𑣞𑣂𑣅𑣃𑣄 𑣖𑣈!!!!
𑢶𑣜𑣞𑣚𑣉𑣄 𑣎𑣉𑣊 𑣜𑣈 𑣉𑣕𑣈 𑣕𑣁𑣄 𑣞𑣈𑣒𑣈𑣜𑣉𑣄 𑣖𑣈,
𑣁𑣚𑣉𑣖 𑣋𑣂𑣅𑣃𑣄𑣓𑣁 , 𑣁𑣖𑣖𑣈𑣖 𑣞𑣂𑣅𑣃𑣄 𑣜𑣈,
𑢶 𑣋𑣈 𑣆𑣅𑣃𑣄 𑣁 𑣆𑣖𑣂𑣓𑣈𑣖 𑣋𑣂𑣅𑣃𑣄𑣇𑣓 𑣜𑣈,
𑣁𑣁𑣀𑣜𑣁 𑣖𑣈𑣅𑣁𑣚𑣀 𑣔𑣉𑣚𑣀 𑣞𑣂𑣅𑣃𑣄 𑣖𑣈!!!!!
अंङो: अयर मिइर – मिइर
नेलो: पुर: , का गे, हि’र – हि’र
सिइयु: कडाको तोल ओल्ल् ता’कोम
आंरा मेयालं दोलं सियु: मे !
रो’ बुसु: बोए्याकोम, लिजुम इनुङाको सोकोए्याकोम,
करे सुइडाकोम सो: लुपु: ,
सियु: रेयोह को सेने जेंयोड् – जोपोड् चि चकुड् – चकुड्,
आंरा मेयालं दोलं सियु: मे !!
अंर, नंगालि, बयर ओल्ले मेया,
कडा जुवा अम एतोय रेदो आंरकिङ मेया,
ग्रोज मेन: रुका, हसि, हनासा जटा सब् तोरसा’कम नेया,
आंरा मेयालं दोलं सियु: मे !!!
एतोवाकड् रेदो एला मर अम तेगे आंर जोङ में,
ओकोनि: एतोम – ओकोनि: कोञे? नेया हों चिना जोङ मे,
कम इतुवाकड् रे हों अलोम उसन, इतुन मे,
आंरा मेयालं दोलं सियु: मे !!!!
मरसलो: जोङ रे, ओते ता: सेटेरो: मे,
अलोम गियु:ना , अमेम सियु: रे,
अम गे इयु: अ् , इमिनेम गियु:उन रे,
आंरा मेयालं दोलं सियु: मे !!!!
𑢴𑣃𑣛𑣃 :- 𑢬𑣉𑣚 𑢾𑣃𑣌𑣈𑣓 𑢹𑣉𑣉
दुड़ु – को’ल सुकेन हो’
