Manmi kowa korom
Manmi kowa korom – : सिंबोंङ्गा अ दाड़े पेःए (पंचतत्व) इर्र जन ते जन यन तेयःऽ गे सिईरजन चि सिरजन बु मेतःऽ। सिरजोनःऽ गुन गे चलेन तेयःऽ चि उपन-जपनोः तेयःऽ तना। एनाते सिरजोन सनाम जीव अर जीनिस को ओदोल-बोदोलेन गेया। चिलिका – तुरोः चनब हासुरोः अ चिका सींगी चॅन्दुःउ, जोनोम तयोम गोनोःए मेनःऽ सरि तेयाःऽ काजि”
जुदि सिरजोन नियम जोनोम तयोम गोनोःए मेनःऽ एन दो मनोवा जीड़ जीवोन चेनःऽ मेनते मेनःऽ? ‘चिलिकन कमि पुरा लगिङ् मनोवा सिरजोना कना? कोनोः रेयःऽ हनल नम लगिड् सिरजोन उँकुडू रेयःऽ इंगुलगार बु नेल उराएयः ।
सिरजोन रेन मोणेया बोगा पेःए (पंचतत्व) ते बईयाकन होम्हो ओन्डोः सिंबोंङ्गा सरुब तङ् जी रोवा ते मनोवा जीड़ जीबोन दो मेनःऽ। एनाते मनोवा दो होम्हो अर रोवा तनःऽए।
होम्होः अः एंगा आपु सिरजोन (पंचतत्त) तनःए एनते होम्हो दो सिरजोनः नियम ते तोलाकना। ओन्डोः सिंबोंङ्गाऽअः सरि सोत्तो सैंयाँ मरसल रोवा गे होम्हो रे सरूबा कना एना सिंोंङ्गाऽअः सनं तेगे रूवःऽ तना। नेकाते होम्हो रेन गुसिया दो रोवा गे तनःए। होम्हो बेगर (गुसियाअः) कमि का पुरा ना। एनाते सिंबोंङ्गा सनं अयःऽ कमि लागिड् गे होम्हो रे रोवा सरूवाकन ते जीड़ जीवोना कना। सिंञबोंगा गे सिरजोन उपन जपन-अर राका जोतोने तना। एनाते मनोवा कोदो सिरजोनःऽ मान मनातिंङ् अर राका जोतोन गे जीड् जीवोन रेयःऽ ओसोल कमि दो तना ।। मेन्दो सिरजोन ओमोंओः तन रे ओल्ल लेन रागो अर रोष ते होम्हो एडकन-बुगिन गुन लोः ते जोनोमा कना। होम्होलोः जोनोमाय ते मेनःऽ एड्कन गुनः को अतोम केह ते नं जीड़ जीबोन रे सरि सोत्तो, निरल रोवऽअः ओसोल कोरोम दो पुरा दईयोःअः ।
‘हो कोवःऽ मुनु दोस्तुर मनातिंङ रेदो होम्हो (सिरजोन) रेयःऽ उन्नति अर रोवा पेःए अरजव केह ते सरि होरा रे सेने तेयःऽ गे इंगुला कना।
मुनु दोस्तुर चोलोन-चनारि (संस्कार विधि) रे होम्हो रेयःऽ मान राका जोतोन लगिङ् ते बर जीया कन होम्हो, जोतोन, पुयुर यन रे जोनोम जाते, हारा मरं यन रे सिंञ सुबा-दारू सुबा, ओन्डोः जोम सकम तुन्डू यन रे तिलतोपा अर अदिंग ते रोवा केया उराऽ दोस्तुर मइना कना।
मुनु दोस्तुर रे रोवा रेयःऽ सेंया पेःए अरजव लगिड् गे (आध्यात्मिक उन्नति के लिए) बोंङ्गाबुरू कोवःऽ सेबा सड़ा दोस्तुर मइना कना। एनाको दो प्रोब-पोनाई मेनते मनातिंडोः तना। सबेन प्रोब रेगे सनाम सिरजोनः राका जोतोन लगिङ् हारि-गोवरि अर बोंङ्गाबुरूः उ तना। एना लोः बोंङ्गा प्रोब को रे सुसुन दुरं, शकोवाँ सड़ि रूतू बनम, दमा दुमं, ताड़ प्रोताड़, रेयःऽ ओ मनातिङ को मेनःऽ।
मगे प्रोबः – (षुकन बुरू मगे, हातु मगे) मगे प्रोब दो मनोवा सिरजोन (सृष्टि पर्व) रेयःऽ प्रोब तना। इपन-इपन रूप ते देंगा केन बोंगा पेःए कोवःऽ सेबा पाड़ा होबाना।
व्ह प्रोब :- सिरजोन लगिङ् ओते, जो लगिङ् ब्ह, होन लागिड् ब्ह ग्तिल रेयःऽ मइन ग्रोजोवा। ब्ह प्रोब दो सिरजोन रेयःऽ सनाम ब्ह को रेयःऽ मईन लगिङ् सरजोम ब्ह डालि सुबा रे बोंङ्गा बुरू केह ते मनातिङोः तना।
होन व्ह :- ब्ह अः होन जो मेनकन ब्ह रे जोः बई यनःऽ गे होन व्ह मेनते बोगाऽ ओः तना।
दों प्रोब : (हेरमूट हेरकर्सा, हेरोः, बताउली जोमनामा) नेन प्रोब को दो चास बास रेयःऽ पइटि लोः ते मनातिंङोःअ तना। सिंरजोन चिलिका-चिलिका तेरषा इडेना एना पइटि केह ते (कर्मयोग से) नेल उरूम अर अटकरे (अनुभव) तेयःऽ बोंगाबुरू तना। सबे कोय ते अयर ते बबा जं सोरदा मइन ते केया उराऽय तेयःऽ दोमरूवा बबा जं हेर उँकुडू अयर ते हेरमूट, बबा को हेर चबा केह ते हेरोःअ, तयोम बबा गेले बार यन रे ईरे अयर ते बताऊली, नमा बबा जोमे अयर ते जोमनामा मनातिंडों तना।
ओवःऽ हाम को – सबेन बोंङ्गा प्रोब रेगे अदिंग रे ओवःऽ हाम को सेबां साड़ा मनातिंडोंः तना। अकोगे होरो तड़ जाँगी तड् बुआ, अकोवा सेंयाँ एतो गे दोस्तुर मेन तेबु मनातिंडे तना। बोंङ्गा बुरू रे नेना को सुल्ल उर्तुकिला, दुप्हूब दिषुम मरंग बोंगा, चनलःऽ दिषुम मरंग बोंगा, बगइति, अऽदटा, एमन को बोंङ्गाओःअ अः।
मुनु दोस्तुर दो मोणे मोचा मोणे लुतुर केह ते अइन मइनोःअ तन ते जीङ्-जीबोन राका जोतोन अर सेंयाँ सोदोरिन नं मुतिड् होड़ो गे कुरूमुटुन दोरकरा। हो ओन्डोः हुदा (समाज) रेयःऽ उनुरूम लगिङ् मनोवा कोवःऽ जीवोन रे नेन पइटियो ग्रोजवा । एना कोदो नेका मेनःऽ।
सेयाँ (शिक्षा) – सेंयाँ हो को अर सोदोरि हुदा रेयःऽ उनुरूम केटेःए लगिङ् सबेन गे ओल पड़ाव सेंयन तेयःऽ ग्रोज गेया। एना लोःअ मनातिङ गनातिङ हिड्नम नमबोंगा सेबा-साड़ा मोन्तोर-जोन्तोर, रेड् रानु पण्डायति षोका, टेन्नड्-पिटिका, बेपर-उपर, एमन को चिर्गल दोरकारा।
हुदाः (समाज) हुदाः रेयःऽ मोजोतो लगिङ् ओंष-बोंष, हगेया बुँदु कुपुल-कुटुङ, निर-बिर नमचारा, राँडि अम्बोरब रिंगा बेरांजि हासु-दुकु, रोगो-जुगिया, प्हाड़ि बहान एमन रे कुरूमुटन तेयःऽ देंगा देपेंगातेयःऽ दोरकरा।
दायित्व : हुदा रेयःऽ दीइत् अर केमटा उदुब लगिङ् एंगा-आपु, होन-होपोन, कोवा-कुई रेयःऽ मान रिकाय दोरकरा। एना लोः ओ गोमके चोमके, मुरई, गुसिया, दासि, चितरा, कुत्लू-कुमिया, देवाँ-दियुरि, डकुवा, मणाकि एमन पोद रेयःऽ माईन रिकाय लोः अपनःऽ कमि पुराय दोरकरा।
आर्थिक : हुदा रे सुकु-सुमुकि लगिङ् मुतिङ् होड़ो गे अपासुल होरा नम तेयःऽ दोरकरा। एना ओते हासा चास-वास ते, नाला नोकोरि ते च बेपर उपर ते होबना। एना लगिड् सबेन गे कुरूमुटुन दोरकरा।
राजनीति : मुतिड़ होडो गे ओवःऽ दुवर, सई, हातु, प्डि, कुणि दिषम राइज, मुलुकु ओते, बनचाव लगिङ, म्हेल-मोजोतो, अचर-बिचर दोरबर पोञचइति एमन रे दुब अयुम अर देंगा तेयःऽ दोरकरा।
साहित्य – मनु दोस्तर रेयःऽ मइन मनातिंङ अर हो हुदा रेयःऽ उनुरूम लगिड़ एंगा हयम हो हयम, कजि जगर, लिपि चिति रेयःऽ ओल पड़ाव बाकणा (व्याकरण) हिताहासा (इतिहासा) गणिड् (गणित) कगोल (भूगोल) सनागोम सेंयाँ (साहित्य) ते मरसलेन दोरकरा।
विज्ञान – दोरोम दोरसोन च प्पाादिर जितकर रे सेंयाँ रेयःऽ ममरं पिटिका (विज्ञान) ते एनं नम दईयोः अः। एनाते अउङ हंकार (भाषा विज्ञान) टेन्नेड् बाचा (टेकनिक ज्ञान) होम्होयोम पिटिका (जीव विज्ञान) एमन-एमन पिटिका सेंया अरजब तेयःऽ ओन्डोःअ हियातिंङ – चकातिंङ (चिंतन मंनन) केएते बनइ-दनई (आविष्कार) लगिड् नमबोंगा (अनुसंधान) तेयःऽ सेंयाँ होड़ो कोवःऽ कोरोम गे तना। पिटिका जुग रेयःऽ ग्रोज गे तना।
नेकाते मनोवा जीड़ जीबोन रे किलि-मिलि पईटी को मेनःऽ। मनोवा जीड् जीबोन रेयःऽ कोरोम (पइटि) उरूम केह ते एड्कन होरा एड्कन पइटी कोय तेबु हरदुःउ अः। जीड् जीवोन रेयःऽ गोनोङ बु उरूम दईया। नेन सेंया गे अबुवःऽ दोरोम दोस्तुर रे इंगुला कना। सेंयां होरा उदुबःऽ केन हड़म को (पूर्वज) आदिंग रे रोवा रूप रे मेनःऽ ते को होरो तड़ जाँगी तड् बुआ। अबुवःऽ नेन बिसास ते दोरोम-कोरोम होरा रे सेने तेयःऽ सेंयां बु नमे तना। नेना गे सेंया होड़ो अर सोदोरि हुदाः रेयःऽ सबे कोय ते मरंग उनुरूम दोः। एनाते हड़म कोवःऽ कटा मंडा (पूर्वजो के पद चिन्हों) ओतोंड केहते आदिंग रे उकुवाकन (अंधकार में छिपे) अइया टोंगःअ रेयःऽ बुदि नम ओल्ले तेयःऽ दोरकर तना। अकोवःऽ सेंयांः बुदि ते एनं पिटिका जुग रे अबुवःऽ उनुरूम दोबु जोगव दईया।
𑢾𑣋𑣃𑣓 𑣎𑣉𑣁𑣜 𑣋𑣁 𑣞𑣓𑣖 𑣌𑣉.