Munu dostur reya pitika seyan chilika te atkar daiyowa
Munu dostur reya pitika seyan : सेयाँ सिनिदुउर (ज्ञान का उद्गम) ओकोय तनःए ?
अबु सिरजोन केन पेःए दो सदय मेनःऽ निःइ सबे तःऽ रे मेनःऽ निःइ, सबेकोय ते पुरःऽ पेःए अनिःइ, सारि सोयता निःइ, का नेलोः निःइ, साऽरन् निःइ, सबेनःऽ अदानिःइ, जी रोवा सरूब निःई दो सिंञबोंङ्गा गे तनःए। सिंञबोंङ्गा गे सिरजोन बुटा दो। एनाते सेंयाँ सिनिदउर (ज्ञान का उद्गम) दो सिंञबोंङ्गा गे तनःए। अयःऽ विषय रे अटकरे तेयःऽ गे सेयां सेतेंङ नेल उरूम तेयःऽ सरि होरा दोको मेतःऽ।
सिरजोन दो चेनःऽ ? चिकाते होबा यना ?
सिञबोंङ्गा अः सार पेःए गे मोणेया दाड़े पेःए (पंचतत्व) रे मइन हितडा कना।एना कोवःऽ मिनिषा तेगे सिरजोन दो ओमोंङ (प्रस्फुटित) यना। सिंञबोंङ्गाः पेःए ईर यन ते जन यनःऽ गे सिरजन दो बु मेतःऽ।
मनोवा अः ओसोल उनुरूम दो चेनः तना ?
सिंञबोंङ्गा अः सिरजोन सनाम रे मनोवा दो मियङ् सेंया जीव तनःए। मनोवा को तःऽ रे सेंया हतं अर निरल जी रोवां मेनःऽ ते अपनःऽ उनुरूम नम तेयःऽ को हियातिङ दईया। जी रोवा बेगर होम्हो रेयःऽ जेतन मान गे बनोः अः। एना मेनते मनोवा सुमं होम्हो-दो का तनःए। मनोवा होम्हो अन्डोः निरल रोवा तनःए।
मनोवा कोवःऽ कोरोम दो चिलिका चेनःऽ होबन दोरकरा ?
मनोवा कोवःऽ उनुरूम होम्हो अन्डोः निरल रोवा रूप रे उरूम यन ते, कोरोमो होम्हो लोः ते निरल रोवा पेःए रेयःऽ राका जोतोन अर मनारंग (उन्नति) लगिङ् होबन तेयःऽ दोरकरा।
मनोवा क्वःऽ ओसोल एंगा अपू दो ओकोय ?
मनोवा कोदो सिरजोनय तेगे को उन्दुब उपन-जपन लेनते मनोवा क्वःऽ एंगा अपू सिरजोन गे तनःए। सिरजोन ओमोंङ केन मोणेया दाड़े पेःए (पंचतत्व) दो दःऽ, सेंगेल, होयो, ओते, रिमिल रूप रे मइन हितडा कना। अकोवःऽ पेःए गे ओयोंङ प्योंङ, ष्योंङ, ल्योंड, कोयोंङ दो। नेना कोवःऽ मिनिषा तेगे होम्हो दो तियर लेना। सिरजोन रे सिंञबोंङ्गा गे जी रोवा दो सरूब तड़ा। एनाते सिरजोन अर सिंञबोंङ्गा गे मनोवा कोवःऽ ओसोल एंगा अपु दो तना। अकोवःऽ मइन गे मनोवा कोवःऽ दोरोम तना।
सिरजोनःऽराका जोतोन दो चेनःऽ तना ?
सिंञबोंगाः अः (“सार”) पेःए गे सिरजोन तना। सिरजोन गे मनोवा कोवःऽ एंगा अपु तना। अकोवःऽ मइन मनातिंङ रिकायः गे मनोवा कोवःऽ दोरोम तना। नेना उरूम अटकर लेड् तेगे अबुवःऽ हड़म को (पूर्वज) बोंगाबुरू कोवःऽ सेबा षड़ा मइन मनातिंङ मुनु दोस्तुर रेको इंगुला तुउडा। मुनु दोस्तुर रेयःऽ सार ओर्तो गे सिंञबोंङ्गा अर सिरजोन सनाम रेयःऽ राका जोतोन तना।
अन्धविश्वासदो चिलिकनःऽ को मेतःऽ ?
सारि चि चकड् का अदानय ते जानःऽ गे मनातिङे तेयःऽ, जान होरा तेगे सेने तेयःऽ, जानिः इ गे विषास तेयःऽ गे काँणा बिसास चि अन्धविश्वास दोको मेतः ऽ। ओकोन होड़ो अर हुदा रेयःऽ मनातिंङ रे पिटिका जुगुतु बेयन (वैज्ञानिक सिद्धांतों पर आधारित व्याख्या) मेनःऽ, नेल उरूम तड़ होरा (जानी पहचानी राह) तेको सेनेया इनकु गे सेंयाँ होड़ो अर सोदोरि हुदा (सभ्य सुसंस्कृतिक) दोको मेताकुवा ।
सेंगेल, दःऽ, अर होयो रेयः, रोङ्, चेनःऽ, तना?
मुनु दोस्तुर रेयःऽ पिटिका सेंयाँ ते सेंगेल, दःऽ अर होयो रेयःऽ रोङ रागो उरूम दईयों अः। नेकोवःऽ रोङ् गे बोंगाबुरू रे होलोंड, संसङ, गिरुम (सिन्दुरि) मेनते मईना कना।
मुनुदोस्तुर रेयःऽ पिटिका सेंयाँ दो चिलिकाते अटकर दईयोःअ अः?
मुनु दोस्तुर-रेयःऽ, पिटिका सेंयाँ दो हो हयम (लिपि चिति वाकणा) अर सनागोम सेंयाँ, ओल पड़ाव केए ते अटकर दईयोःअ अः ।
एंगा हयम रेयःऽ ममरं (महत्ता) चेनःऽ मेनते ग्रोजवा
सनागोम (साहित्य) रेन विद्वान को ओलाकडा – ओकोन जति हुदा कोवःऽ अपनःऽ – एंगा हयम (लिपि चिति) मेनःऽ इनकुवःऽ गे सनागोम (साहित्य) मेनःऽ। ओकोन कोवःऽ सनागोम मेनःऽ इनकुवःऽ गे हिताहासा (इतिहास) मेनःऽ, ओन्डोः ओकोन कोवःऽ हिताहासा मेनःऽ इनिकुवःऽ गे राइज (राजअधिकार) दो मेनःऽ। नेन गोनोडअन काजि सरि तन गेया। अपनःऽ हातु दिषुम दोस्तुर मनातिंङ मेनकन अपनःऽ उनुरूम जा जोरोङ जकेड़ तयुःउ लगिङ् एंगा हयम रेयःऽ ममरं रिकाय तेयःऽ ग्रोज गेया।
अड् तुडा कन हुदा
आदिवासी हो’ कोअ: हुदा सरि तेगे अड् तुड् चबा कना।
१).हो’ हयम ( भाषा ) सबिन को रीङ चबा उजु: तडा।
२).दोष्तुर होरा सबि को रीङ उजु: चबय तना।
३).पोरोब् पोनइ पोचा पोचा मनातिङो: तना।
४).पोरोब् दुरं को अड् उजु: केडा।
५).ताड़ को अड् उजु: केडा।
६).पोरताड़ को रीञ उजु: केडा।
७).सुसुन को रीङ चबा तडा।
८).वोंङ्गा-बुरु हाम हो दूउम हो को सेबा-षड़ा मान मनातिङ को रीङे तना। मेन्दो नेना को सगोम उरा केन गुरु गे तिसिङ को लन्दा सेंया ती तना।
– अकिञ: दर्शन कको सोमजउ: तना।
स्रोत – सेंया सुड़िता
