Shirjon katha kal lekate
“हो” हुदा कोव: विषास लेकाते सिरजोन कथा नेलेका को जगारेया। ओकोन सोमाय गोटा दिषुम गलिड़ ते पेरेःए चबा यना। हिसा चेन्टा, कुसूर-कुपुसुर, रिंगा, बेराँजी, गोपोःए, तपम एमन-एमन ते मनोवा को जीव को सनाम हाय तन बलबल तना, दुकु ससाति साँगी यना गलिड नोलड ते गोटा दिषम अब चबा यना, इमितं दिषुम मुचड् सेंगेल गमा होबा लेना। अई निदा अई सिंगी सेंगेल गमा ते दिषुम लो अतर चबा यना। मोणा सिंःइ सुकुल ते दिषम हेन्दे नुबःऽ उतर लेना। तयोम दो इषु पुरःअ अ होयो गमा प्हड़ि होबा यना। गोटा दिषुम रे दःइ गे दःड् पेरेःए यना। दिषुम कोवाँसी नुबःऽ ते दलोब् चबा यना। सिरजोन सनाम जीव जोन्तु को मुचडे यना।
मेन्दो! सिंबोंङ्गाअः तूमान ते सिरजोन मुति “हितापूँजी” नगे एरा-बिन्दी एरा किंग होरो जोतोन केडा। चिमिन उड़ि-गुड़ि तयोम दःइ तोबोला को तम्बारूब यना तयोम सिंञबोंगा अः सार पेःए सिरजोन लेचकोम उरा यना। नमा सिरजोन लेचेकोम रे माँङ ते लेनडड् उन्दुब यना। लेन्डड् कोगे दःऽ बितराए ते हासा को जेःए रकब लेडा। तयोम दो चोके को उपन यना। गोटा दःऽ चेतन रेको जरोम जॉल पेरेःए केडा। एन तयोम दो काको उतराव यना। एन हासा दःऽ बराबारीःइ सेसा रकब लेडा तयोम दो एन हासा रे निदिर बेरेड् यना। निदिर बुनुमेःए रका केडा। एन बुनुम गे हारा मरं-लेन ते ओते बिर्र जना। नेन बनाए रे इषु पुरः सोमय सेनोः यना एनागे काड़ बु मेतःऽ। निमि लोःअ हेन्दे नुबः कोवाँसी अतोम यना अर सिंगी चॅन्दुःउ कि नपेल यना। जेटे गमा को होबा यना। एनते ओते रे दुम्बु बुदड् दुबी तसड् सिरुङ चिरू को ओमोन यना। बिर-बुरू बिरेड लेना, जी रोवा उन्दुब, उपन ओमोन अर जोनोम यना। सुवय सुवय ते ओते दःऽ, अर अपिरेन जीव को ते सिरजोन सनाम सिंगर यना। तयोम ते सिरजोन राका जोतोन तेन सिंबोंङ्गा अः कुमिया सेंया जीव मनोवा उन्दुब उपन लेना।
मनोवा सिरजोन रेन माङ होड़ो कुलगिया दो लुकुहड़म-लुकु बुढ़ि तिकिन तना। अकिनय तेगे मनोवा जोनोम दो तेरसा यना। अकिनःऽ सेयाँ सेनेतोम गे अबुवःऽ मुनु दोस्तुर दो। एनाते अबु, अबुवःऽ दोस्तुर, अबुवःऽ हयम सिरजोन लोः गे उन्दुबा कना बु मेनेया।
हिड्नमा कना, नमा सिरजोन कत्हा रेयःऽ सेंयाँ सार दो नेलेकाःञ् ।
उपुनदुब काड़
नगे एरा बिन्दी एरा
उन्दुब काड़
लेन्डड्
उपन काड़
चोके
उतराव काड़
काकोम
बेरेड् काड़
निदिर
बिरड् काड़
सिंगी-चॅन्डुःउ नपेल
बंय बुसुःञ् काड़
उर्तुर्
जाते काड़
दुप्हूब दिषुम मरं बोंगा
जोतोन काड़
गोवाँ बोंगा
गितिल तकिड् काड़
देषाउली
दःऽ दोनोम काड़
जयरा
राहका काड़
पाऊँई
जगाति काड़
बगिया
दुप्हूब काड़
लुकु-लुकुमि
नेका मेनःऽ ताबु दिषुम मुचड् अर सिरजोन लेचकोम काऽनी।
स्रोत – सेंया सुड़िता