Singbui chi Singhbhum otehasa
सिङबुइ रेय: मुनु नुतुम दो सिङ रइज तइकेना।
सिङबुइ दो ना: अबु जोनोमा कन उपड् तना। हर्ताहसा बितर रे झारखंड रइज मेन: । झारखंड रेय: मि कांडा चोटानागपुर रे नेन उपड् तबु दो मेन:। नेया अबुव: मुलुक ओन्डो: ओत् तला रे जकेड् सबेन कोय ते सुगड़ सुन्दोर टयड् तना। षिङह्बोङ्गा चियड् उड़ु: दिटा लेडय ते बइ तडा। हियातिङ चकातिङ रेदो षिङ्गर साजो तोपाह कन लेका चिर्गलो: अ:। बियुर सेकोर बुरु कोते बकइया कना। सेके: रोलो: जिइड् द: सेतेङ ते हिञ्जिया कना। कोचा कोंदोल लो’र लोङ्गोर अदो गड़ा कोते बकइ तलोमा कना। नेन उपड् रेय: द:, हसा, गितिल, दिरि, पत्ह ओन्डो: दरु गोनोङन तेय: सुनंङा। जिउ – जोन्तु हों रोकोम – रोकोम मेन: कोवा। चेणे – चेपोरोड् एन्का गे सलाबगे मेन: कोवा।
चिर्मड्:- सिङबुइ ते जम्बरा रेदो रन्चि अदो दनबाद उपड् मेन:। तुरो: स: दो बंगाल रइज रेय: मेदिनीपुर अदो बंकुड़ा उपड् मेन:। कन्दुवा रेदो उड़ीसा रइज रेय: मोरबोञ्ज (मयुरभोञ्ज), किञ्जिरि (क्योंझर) मेन:। हसुर स: रेदो उड़ीसा रेय: सुन्दरगढ़ उपड् अर रन्चि रेय: जोका केच: मेन:।
उमि :- सिङबुइ रेय: मुनु नुतुम दो सिङ रइज तइकेना। एन उड़ि सिङबुइ दिषुम रेय: चिर्मड् (सीमा/सरहद/Border) मरं तइकेना। एन अषड़ा दो नेना चउरासि, बुन्डु, तमड़ा, नगरा, हसाद: अदो नगुरि हितड् कोरे हटिङ लेन टइकेना। सिङबुइ उमि दो एसु रसिका कहनि ते चेडा कना, मेन्दो नेन ता: रे कटि: टुटुका तेञ् उदुबे तना।
हसुर स: सिङबुइ रे पोड़ाहाट पिइड़ मेन: । एन पोड़ाहा’ट पिइड़ रे सिङ बिर तइकेना। सिङ बिरे ते सिङब्ह गड़ा ओल्ल् लिङ्गि तना। ओकोना ना: बरसिङ सञ्जय गड़ा को मेत:। मुनु एन ता: रे बहदुर मुन्डा ओन्डो: एपेराते तिरसि किङ तइकेना। ह्बोङ्गा सोयता दिन्डा मुन्डि किङ गिपिङ रे हुन्डुरु दरु किङ पुउ केडा। अदो बर होड़ होन किङ नम लेड् किङा। इनकिञेह ते मिडोह दो मेड् मको पुसि: कि: गड़ा द: कि: यको। हुड़िङ नि: बुगि: तइकेना अदो इनि: दो को राजा कि: या। इनि: य: ओङ्ष बोङ्ष नुमु तेगे षिङबुइ दिषुम रेय: नुमु होबा यना। एन बोङ्ष रेगे तयोङ चोटानगरा रे दो तुङ् राजा: होबा यना। इनि: सिङ कुला रे: असोवारिना ओन्डो: कुला ते: सियु: अ: , एन्को ते बबा को एना। सिङबुइ पेह बारा चि गां रे हितड् हटिङा कना।सदर, सरइकेला अर दलबुम। मुनु दो एना मोङ्गोल मुंदि, साए् ओन्डो: दोड़बुइ को मेता तइकेना। मोङ्गोल मुंदि रे कोल्हान नुतुम ओकोन टयड् एना अबु को’ल कोव: एकतियर जयगा तना। सयोब् को हुजु: एटे: लेन उड़ि नेन रे एसु पुर: मप्प: तुप्पुञ्, ञेप्पेड् को होबा यना। एन रे अबुङ कपि, टेबो, बमोनगा’टि, सेरेङसिया, कन्डरा, बोञ्जडिह एमन उमिया कना। एना दो गुन्टिया अन्डिया ञेप्पेड् मेन्ते को मेनेया। तयोम दो सप्पब् ( अ:सर ओन्डो: सर, कपि – तोरइ ओन्डो: बुंदु) ते टको कुप्पुषुर यन कलकता ज: को जुर तण: केडा। सिङबुइ रे चिटुङ – चरि बुरु, दोलमा – रोन्डा, सिङ्गेषोहर, डबरा, चम्बरा बुरु, हेंदे बुरु ओन्डो: जन्डि बुरु को उमिया कन बुरु तना। एन रे सरान्डा बिर गे सबिन कोय ते मरं बिर दो। एन्का गे गड़ा कोदो रोड़ो, सिङब्ह, कुजु, सोबोनरका ओन्डो: कड़ो, कुइलि नुतुमा कना। ओन्डो: टयड् कोरे डोङ्गोल (चाईबासा) , चकाह (चक्रधरपुर), कलिमटि (टाटानगर), झींकपानी, नोवामुन्डि, जमदा, गुवा, किरिबुरु एमन मेन:। सिङबुइ रे ओत् पोवा (minerals/धातु) हों पेरे: अकना। मेहड् दिरि (Iron ore), बिचा (Diamond), इ’म दिरि (Manganese), सोना (Gold), रुपा (Cilver), तम्बा चि जिइड् दिरि (Copper), पितल (Brass), सुतम दिरि (Asbestors) , पितल दिरि (Mica), हसांगर (Coal), हसासुनुम (Kerosene), बिचा (Diamond) ओन्डो: चेटेर (Uranium) एमन अगरा कना। नेना रेय: जोहर तेगे ब्हरो’त दो एङ्गा (Mother India) मेन्ते दो उमि लेना। तिसिङ हों गे ओत् जकेर हया हिताह होतोह तना।
ओतोल्ल् :- को’ल लको बोदरा (हिताहसा कागो’ल) ✍️
सगइयन पुति :- षड़ा षड़ा संङेन।
सिंहभूम का संक्षिप्त परिचय:
स्थान: झारखंड के दक्षिणी भाग में स्थित।
नाम की उत्पत्ति: “सिंहभूम” का अर्थ है “सिंहों की भूमि” या “सिंह राजाओं की भूमि”।
प्राचीन इतिहास: यह क्षेत्र कोल, हो, मुंडा आदि जनजातियों की मूल भूमि रही है।
प्राकृतिक संपदा: लौह अयस्क, तांबा, मैग्नीज़, बॉक्साइट आदि खनिजों से भरपूर।
उद्योग: टाटा स्टील (जमशेदपुर) भारत का पहला निजी इस्पात कारखाना यहीं स्थापित हुआ।
संस्कृति: जनजातीय संस्कृति, भाषा और पर्व यहाँ की विशेष पहचान हैं।
Esu bugin sayob tikin,esu bugin,Nena dorkar taikena,nen channel madyom tey ,ol madyom tey esu pureh patuye ko seyan ko nameya ,neleka ke mang tey do oth guru ol tad puthi koreah hited kobu ol parchi ma,enredo sanam manmi ko nusinj bano musinj ko sudureowh gea……..Johar sayob,hirla warangdale hirla