Beliefs of Ong in Ho society
Beliefs of Ong in Ho society ओ’ङ दो चेन: तना ?
ओ’ङ क्या है ?
हो’ समाज का पहचान चिह्न ओ’ङ ही क्यों ?
ओ’ङ दो रोवा: रूप गे तना। ओकोना चुइलव का गोजो:चुइलव का मुचाडो: अह। (आत्मा अजर-अमर है)
मनोवा होमोह बितर गोम्पय षुर्र रे नेका गे कुचा कनो:अह।
कजि रे मेन: #ओ’ङ #वारङ_सबे_रूप_अम_सबेदा_सबेता:ओ’ङ रोवा रूप ते षिञ्वोङ्गा: चिनब् (चिह्न) तना।
ओ’ङ रोवा रूप ते सबिन: रे सबिन त: रे सबिन सोमोय रे: टइना। अदान गेयाबु अबु रोवा गे सेबा षड़ा तन जोतोन तन हो’ जाति होड़ो को तनऽबु।
अबुव: दोष्तुर रे जोनोमे’ते गोनोए् दोष्तुर जोङ रोवा गे सकि तला गोड़ोम तलय तेय: चोलोन एसु बुगि लेकाते नेल दइयो: अह। जोनोम दोष्तुर जो’ङ एकसिया रे सिटिया: सकि नम चि तुपु नम ओव:गोए् हाम हो दूम हो कोव: रोवा रेय: सगइ गे: इङ्गुले तना।
हाम हो कोव: रोवा लो’:ते चिपिनब् इची लगिड् तेगे कोयोङ अदेरी तेय: चोलोन दो:ए इङ्गुले तना।ज्ह मुसिङ जह्न टयड् सेन तन होनोरतन – चकुरतन रे #रोवा रूप ओव: गोए् कोगे गोङ्गोर तइ सुतु: तइया। ज्हन एडकन: होबन अयर ते #रोवा_रूप ओव:गोए् कोगे उदुब् चि चुन्डुला बुआ।
🐍🦂बिङ-मरमर ,🐅🦥कुला-बलु को रेयो क्ह अटाकर कबु अटकर तको रेयो #रोवारूप ओव: गोए् कोगे उदुब् केरा बुआ।(नेका सिदा: हो’कोगे कजिया तूडा।)
आंदि दोष्तुर जो’ङ कोवा-कुइ किङ(अइषियन अर बोयोषोवन) अइ दउ बियुर सकि केहकिङे’ते हेबे अदेर #रोवारूप ओव:गोए् कोलो’: तेगे चिपिनब् इरि किङ तेय: इङ्गुल तना।
कुइ होन कोवा ओव: को अगुइ इमिता हतु चिरमड् रेय: उलि दरु रे अय: #रोवा जा जोरोङ जके बुगिया कनो: नपऽया कनो: मेन उड़ु: लो’:तेगे अइ दुनऽए् पटुवा तू:आ।
(उलि दरु लो’:ते रोवा: सकि च्लिका मेन: ? ☝️सेंयन जो’ङ #षहर_होरा – 3 हितड् पड़ाओय चबु ! )
कुइ होन अदिङ रे चटु लुन्डि: रेय: हितड् एम सोम्पवइ तन जोम इसिन कजि रे चिमिन ममारं तोरं मेन: ?
उड़ु: लेका:बु
गोनो:ए् दोष्तुर जो’ङ दनंयन हो’ य: #रोवा अदिङ रे केया अदेरे तेय: चोलोन मेन:।
रोवा केया तन रे कजि सपाओ अह – “अकारिङ केन केजा केन्को ओव:गोए् हाम हो दूम हो को ”
✍️ ओव:गोए् हाम हो दूम हो कोगे अबु दो #रोवा लेकाते सुतु: ता गोङ्गोर ताबुआ । अबुइ ते बड़ि: होबायन में रेदो अको गे अकारिङ केजाबुआ।
ओव: अदिङ रे केयाह कन रोवा नुतुम ते अबु ज्हन: जेतऽन: बु जोमे नूइ अयर ते दोहोमे (अर्पित) तनाबु । ना:ओ बड़ि: को होबायन रे ओव:गोए् को हातिरा।
पोरोब् पोनई कोरे जकेर हाम हो को नुतुम ते अदिङ रे का ससंङा कन मन्डि उतु इलि एमन तेबु सेबा षड़ा’ को तना।चिमिन बुगिन रोवा रेय: दुलड़ षोर्दा मइन ममऽरं बु रिका रका तडा । रोवा एलादहरा लगिड् पोरोब् रेय: जोमषुटम् मांडि कुलगियाहकन कुइ गे जोमे तेय चोलोन मेन:।
अबुव: हुदा दोष्तुर #रोवा_रूप_षिञ्वोङ्गा: एनेम गे तना।
#रोवा_रूप_षिञ्वोङ्गा: रूप ओ’ङ गे होबा दइयो:अह एट: लेका दो कागे।
अलंङ: षुर्र 💗 रे मेन: षिञ्वोङ्गा ओ’ङ लेकन रूप रे मेन:इया।
वारङ चिति लिपि रेय: मूड़ चिति ओ’ङ रेय: ओर्तो षिञ्वोङ्गा गे तना।
अलंङ: होमोह रे #ओ’ङ मेन: मेन्ते गेलं #ओङ दइया तना।
🛑ओ’ङ (रोवा) बेगर ज्हन पइटि का होबाना ☝️
एना मेन्ते ओ’ङ गे मूड़ दो।
अलंङ: होमोह रे रोवा गे का टइन दो चिके लं बोंगा बुरुया।
षकोवां चिके लं ओरोङेया।
वारङबिलि रेय: वारङ षड़ि ओ’ङ गे तना।
वारङ चिति रेयो #ओ’ङ तयोङ #इपन_ब्रोङ एन चनब् #बेङन्_ब्रोङ कोरे ओङ केड़े: पेड़े: रेय: इङ्गुल तना। अबु #रोवा_रूप_षिञ्वोङ्गा बु सेबा षड़ाइ तेगे हिन्दु को’को कजीया।
ओ’ङ सेबाए् नमा।(ओम् शिवाय नमः)
ओ’ङ नमऽए् सेबा। (ओम् नमः शिवाय)
☝️अबुआ उनुरुम दो चुइलव का गोजो: चुइलव का मुचाडो: तेय: रोवा/षिञ्वोङ्गा रेय: चिनब ( निशानी ) गे तबु।
षिञ्वोङ्गा: दुलड़ रोवा रूप तेबु सिंगारेन चा , मणा ✝️तेदो का।
ओ’ङ जोह रम तिङ दो’म।
📝ओल सगोम
सितुरु हो
#सा_जन हेस: (सगेन सकम्)
सौजन्य से
IACSS
एटे: तुर्तुङ पिटिका अक्हाड़ा
दुप्हुब् हुदा
