Mage Porob sirjon reya porob tna
☝️मगे पोरोब् षिरजोन रेय: पोरोब् तना।
मनमि षिरजोन् रेय: उपन जपन रे ओकोन षेंयां कमि को होबा लेना अर सेसेन लेना, एना रेय: मइन ममारं रिकय लो’: उड़ि ओड़ोङ मनातिङ गनातिङ रिकय तेय: गे मगे पोरोब् दो।
☝️ओकोन इमितं नेन ओत् दिषुम् रेन दुप्हुब् होड़ लुकु-लुकुमि तिकिङ (रोका नेपेल नपम यना) षुकन यना। एन उड़ि रे षिञ्वोङ्गा अकिङे: तुमान तला (आशीर्वाद) केड् किङ लो’: कजियड् किङा चि अबेन नेन दिषुम् रेय: रिता हिता पुञ्जि अर शासन रेय: दीत् (दायित्व) कोञ् एम सोम्पवा बेन तना।
मेन्लेका षिञ्वोङ्गा: सनं षिरजोन अयर पा तेरसा इचि किञ् तेय: तइलेना।
अबु अदान गेया नेन ओत् दिषुम् रे #एंगा चि #मा बेगर पुञ्जि पोवा (सृष्टि) का होबा दइयो:अह , मा बेगर होन: जोतोनो’ कगे होबा दइयो: अह।
👌एना मेन्ते मा गे मुन्डि दो।👌
👉मेन्दो मा बइन लगिड् #मा रेय: #गेयान (मगे) ग्रोज लेकऽते ।👈
🌍षीरजोन अयर ते षिरजोन अर षिरजोन रका रेय: षेंयां दोरकरा🌏☝️🐆🐅
☝️षिञ्वोङ्गा लुकुमि य: होड़मो रे मगे रेय: षेंयांए् दहरा केडा।
लुकुमिय: होमोह् रे ओमोल (period/ऋतु-स्नान) उङ्कुड़ु यना।
🛑Note – अदान गेयाबु ओकोन कुइ होन रे ओमोल का सेसेना एन कुइ होन चुइलव एंगा क:ए् बइयो:आ।
अन्डो: ओकोनि:य: ओमोल् बुगिते का सेसेना। एनि: किलि किसोम हसु दुकु ते: तलमो:वा। ओकोना चि होन गणा को पा जके सेसेना।
☝️ओमोल अषाड़ा बेटन गेल मोणे म्ह अयर ते सरदि चन्डु: पोनइ 🌕 रे षिञ्वोङ्गा: सनं लेकाते #कुलय 🐇 रूप ते उजु: केन्ते 🧒🧑लुकु-लुकुमि तिकिङ #रनु बइ तेय: सेंयाए् एमड् किञा।अर सग: चउलि ते #इलि उपुडे तेय: कोए् एतोवड्।
🛑 Note- ☝️ओकोना चि होम्हो लगिड् ते अमृत लेका रेए्ड रनु रेय: पइटि: एमेया।
षिरजोन तियर तन रे होम्होय ते दुन्ड:यन पे’:ए् ओम सांगे तेय:।
🐇🛑मगे मुन्डि चि मा गे मुन्डि दो🛑🐇
एनाते षिर्मा मुन्डियो’ मगे चन्डु: गे।
ओकोन रेय: दुरं पोरमान सकिया कना सिदा सोमये ते
👇👇👇👇👇👇👇👇👇👇👇👇👇👇👇👇
👉 “सरदि रबं होलो होलो
मगे चन्डु: बोलो बोलो
चिका लेयोन जोकोन तन
गेले गेले ब्ह ब्ह मताह कन।”
ओर्तो पञ्जा नमे रेदो चिरगेलो: तना सिरमा रेय: एटे: मगे चन्ड:उई ते होबाना• ओकोना सरदि चन्डु: तुन्डुउ तन लोह: गे बबा मतह कन सुल्ल मगे पोरोब मनातिङ ते रेय़ाह रबं लोह:
पोराडेना/ सी रेदो हसा बुउ पड़ुबो:अ मेने लेका ते हिड नम नम वोङ्गा डोगोरे तन रे ओतोङ ओतोङ ते एना जकेड नमो: तन चि मगे पोरोब रेय: एनेटे: दो दुप्हुब हड़म बुड़ि किङ: रिता मुति काड़ रे लुकुमि बुड़िय: ओमोल दोष तुर लेन: उड़ु: बेटा मेना गे कजि केटे:यो: तना /
द़ोष्तुर पोरोब मेने रेद़ो होनं एन मगे चन्डु: रेगे मनातिङे तेय: निरला द़ो मेन दईयो:अ• चेन: चि पोरोब पोनई हपानुम ओमोल (Menstrual Discharge Of Woman) लेका गे इरिल मह मनातिङ तेय:/ नेका अईदाय तेगे मनातिङ हुजु:उ तन ते ओनमान परचि रेनाओ: तना हयम अर संङम सिदय तेगे मेन:/
🛑 नेन दुरं रेय: पोरमान
१. पिटिका (Science)
२. पुदगल (Nature)
३. गणिड् (Maths)
लो’: ते एसु बुगि सकिया कना।
🦢💎#पिटिका (Biology) ओड़ोङ होमोयोम पिटिका लेकाते कुइ होमोह जुदि लं अटकरे एनरेदो ओमोल अषड़ा रे कुइ होमोह रे
“सरदि रबं होलो होलोना
चिमिता मगे चन्डु: बोलो बोलोना
चिलिका लेयोन जोकोनेन तन लेका
गेले गेले(ग्रेम्से:) ब्हगितिल् रे मताना।”
👉चांडु: पाए् नेल तन रे (1st day) उङ्कुड़ु मुसिङ एन् कुइ होमोह स्ह स्ह रुसु रुसु या होमोह रेया गे टइना
ब्ह गितिल रे ओमोल बइन तनते गेले गेले लेयोन जोकोनेना।
🦢💎 पुदगल ( Nature/ प्राकृति)
#पुदगल ओड़ोङ जुदि बु नेलेया
“सरदि रबं होलो होलो ……… मगे……मताकन।”
चिमिता रबं सरदि रेनाह कनो:आ इमिता गे मगे चन्डु: दो बेटा ना । अर एन इमिता बबा लेयोन जोकोन तन गेले गेले मता चबाह कनो:आ।
🛑☝️नेना गे ओसोल मगे चन्डु: दो।
🦢💎
#गणिड् (Maths) लेकाते बु नेले एन रेदो
“सरदि रबं……………… मताकन।
गेल बर 12 षिर्मा तयोङ कुइ होमोह रे गेले बारो:आ (ओमोल सेसेना)
एना मेन गेल बर बु मेत:।
गेल बर षिर्मा पुरायन ते कुइ होमोह रे मगे चन्डु: बोलोआ।
कोआ कुइ होमोह रे अंगिर लना:ना।
गेले ब्हर चन्डु: नेल की तयोङ मगे चन्डु: (षिरजोन सेंया नमलेड् चन्डु: ) बेटा उराना।
☝️🐆🐅
मेन्कन् जा रेयो दुरं ते मा पोरमान यना
एन्दो एला अकिङ षेंया लेन दिलं को बु नेले
🌙 मगे चन्डु: मुलु:
✍️🙏 #अनादेर – नेन मुसिङ अं चपं तुर चपं रे लुकुमि य: होमोह रे ओमोल सेसेन उङ्कुड़ु यना।
अनादेर मेनो: लेका तेगे नाअ जोङ् मगे पोरोब् कोरे मगे बोलोआ कड्पेया को मेएना।
🛑☝️नेन मुसिङ कुइ होमोह स्ह स्ह तइना।
✍️🙏 #गउमहरा /गउओल्ल्
नेन मुसिङ गोवांवोङ्गा महदेड् उरि:या कन्ते गोटा होम्हो सग: लेन्ते: उजु: लेना अर मरं लेकन सन्डि बुनुम त: रे हुड्गां’ बियुर केहते बुनुमे: उटुब् पोङ्का रेनाह केडा।
अन्डो: कुदा सुबा रे बुरुम यना।
अर समाड़व बेन मेन्ते: मेतड् किङा।
अर नेन मुसिङ सेंगेल उनुपने: (आग का अविष्कार) एतो लेड् किङा।
2nd day
🛑Note – ☝️नेन मुसिङ कुइ होमोह उरगुम लोलो गे तइना।
☝️नेना र: ओतोङ तिसिङो रचा रे बुनुम् उटुब् तनि: सग: तेबु अचालीया अर कुदा षुड़ा बु सिदुबा क:ऽ।
नेना रेय: ओतोङ नाअ् जोङ कुदा प्तह तेबु जमडाया। नेना जिबोन जोतोन दरु तना।
🛑☝️🐆🐅 सग: सयू पटुतन गूतुतन दिन गे ओसोली मगे चन्डु: दो।
तिसिङो होको गउमहरा का बोंगाह कयते होको सग: कको ईरा!
कुला🐆 गो’ गो:वा को मेनेया।
एना मेन तरा मरा अयरतेको गउमहरा अताह त: चनब् ते रेयोह को मगे पोरोबे तना।
✍️🙏 #ओतेइली – अपेह म्ह रे लुकुमिय: होमोय ते ओमोल ओते रे टेब् यना।
नेन मुसिङ #नगे सेनेयन ते ओमोल रेय: गून अर द: रेय: ममारंङे कजि षेंयां सोलोङड् किङा।
च्लिकन उड़ि रे द: टयड् जीड् जगदा को सेन बुगिना अर च्लिकन सोमय कागे।
ओमोल टेबेयन त:एह ते ओकोना गे उसुर ते दुम्बु बुदाडेना! अञ: टयड् बेन सेन रेदो एना तेगे बिसि बिटले’ ते परचिन लगिड् अञ् मान मनातिङिञ् बेन।
मेन्लेका गे तिसिङ जोङ ससं गे नगे नुतुम तेबु एम चेडे तना।
चेन: चि लुकुमिय: टेब् ओमोल् मयोम उसुर ते ससं गे उपन लेना।
🛑Note- ☝️तिसिङो जुदि बु पञ्जय् मगे चन्डु: मेयंतेर रे बेरेल ससं टटका ओमोल लेका सोवाना।
✍️🙏 #हे:सकम् 🍃
लुकुमि य: ओमोल पाड़ि यनते बरो’ रे गियु: गमं होबालेना ।
नेन मुसिङ #आअ्वोङ्गा अर दनसरि वोङ्गा किङ: चुबि ते लुकु दो सरजोम सकम् कर लुकुमि दो रूङ सकम् ते गियु: दपल एसेड् केड् किङा।
एन तयोङ अकिङ दिरि सेर्र ( बड़य बेएद), कतु बइ (कमर बेएद) सुतम बोर लिज: तेङ(पेंयय बेएद्), चटु चेलं बइ (कुंकल बेएद), चला, हट:, डला (डोम बेएद्) एमन तेमन टेन्नेड् (Technology) रेय: सेंया किङ एतो लेडा।
नेन सेंयां इतु तन रे वोङ्गा बुरू किङ किसुम रोकोम् रूप मेन्कन बिन्दिरम् – लुगम तेकिङ अपेल लेना।
☝️🛑Note – नेन मुसिङ लुकुमि रूङ सकम् ते गियु:इ दपल यन तेगे नाअ् जो’ङ दोष्तुर ओड़ोङ जूर पाते कको जोम नूनूवा।
☝️बिषि नजोम एम् तनि: जुदि मगे चन्डु: रे: जूर पाते: एमड् मेया एनरेदो उड़ु: तम दुषिया दो ओकोय?
☝️रूङ सकम् रेय: सिरा पोरोब् पोनइ रे हुव: टो: केहरे बांजिया।
☝️एना मेन कजि मेन: बूञ्ज जो बूञ्ज ब्ह तेञ् सेबम् तन षड़म् तना ।
☝️ मगे चन्डु: रेगे लम: दो पकोड़ोना।
✍️🙏 #लोयो_गुरि – नेन मुसिङ कुइ होमोह सपन मेन्कन नेन मुसिङ वोङ्गा को उजु: केन्ते मुटु सेंगेल तला तयते तिलमिङ, राइ मनि जं उरुब केड् ते तूउम (आशीष) को एमड् किङा।
अर को कजियड् किङा चि दुकु ससाति उड़ि रे नेन जं रेय: मो: गे तूउम बेना।
अर #गोवांवोङ्गा अकिङ राई सुनुम मनि सुनुम ते: इतिर बोड़ो:एया तूड् किङा।
🛑Note- ☝️नाअ् जो’ङ बु लेले रेयो पुर: रबं रेयोह मनि सुनुम तेबु सुनुमेना।
☝️कुइ होमोह जुदि ओमोल् अषाड़ा रे तइना ओड़ा ऊम् केन्हेते मनि सुनुम राई सुनुम ते: सुनुमेन चा।
☝️षुनि ताई् तडि:तो मनि सुनुम् ते तूऊम सेंगेल तला बु तरसंङीया।
☝️बोंगा तन रे उरुब बड् तन रे मनि जं गे।
☝️मोन्तोर चा बोंगा कटोन लगिडो’ मनि जं सुरसु जं गे पइटि रे अगू’: तना।
मनि जं रे एन पे’ए् षिरजोन रका लगिड् ते एम सोम्पवा कना।
ओकोना सोका,देवां को नाअ् जोङ को ओतोङ तडा।
ओकोय जुदि मगे चन्डु: रे नेना ते दोष्तुर ओड़ोङ तूउम तलाओ:अ: इनि षिर्मा गोटा नपय गे: टइना ।
✍️🙏 #मरं_पोरोब्- नेन पोरोब् दो एना हियातिङ रे मनातिङो: अह ओकोन मुसिङ ओमोल सेसेन तुरुइ म्ह होबायना एन मुसिङ देषाउलि जेङ्गा सदोम रे उजु: केन्ते होयो षयड् (स्वर विज्ञान)रेय: सेंयाए् एमड् किङा ।
जेङ्गा सदोमो इच: ब्ह ते: तसिर लेना।
च्लिका चि होम्हो पुर: स्ह स्ह यन चि रब तनरे ओकोन कुटि ते सूतन रे होमोह लोलो’: अह।
ओकोन् कूटि ते सूता षयडे रे लोलो होमोह् रेयाओ: अह ।
ओकोन षयड् सेसेन तन रे ओड़न ग्रोजा ।
🛑Note-☝️नेना रेय: ओतोङ नाअ् जो’ङ कोल हो’ देंवा सोका कोरे मेन:।
☝️मगे मेनकन् मा रेय: गेयान गे मुन्डि दो।
☝️कुइ होमोह रोगा रे इच: ब्ह रेड् रनु रे अगू:वा।
मा गे मुन्डि दो।
मगे चन्डु रे जुदि निमिनं रेयोह बेन ओतोङ केडा एनरेदो उड़ु ताबेन।
नेन षेंयां गे रका तड् जंगि तड् बुआ।
मेन्दो मगे षेंयां बनो: तेगे तिसिङ दुकु ससाति तेबु तलोमा कना।
☝️🐆🐅
ओल सगोम्
सितुरु सिटिया
#सा_जन हेस: (सगेन सकम्)
सौजन्य से
एटे: तुर्तुङ पिटिका अक्हाड़ा।
दुप्हुब हुदा।